Lumpy Vaccination : मांडवे परिसरातील १८ हजार जनावरांचे तत्काळ लसीकरण

रत्नागिरी ः मांडवे (ता. खेड) येथे एका बैलाला लम्पी स्कीनची (Lumpy Skin) लागण झाल्याचा अहवाल आल्यानंतर पशुसंवर्धन (Animal Husbandry) विभागाकडून कडक उपाययोजनांवर भर देण्यात आला आहे. गेल्या आठवडाभरात लागण झाल्याची शंका असलेल्या पाच किलोमीटर परिसरातील १८ हजार ६०० गुरांचे तत्काळ लसीकरण करण्यात आले आहे.

महिनाभरात जिल्ह्यातील २ लाख ७६ हजार जनावरांचे मोफत लसीकरण करण्यात येणार आहे. खेड तालुक्यातील मांडवे परिसरात एका बैलामध्ये लम्पी स्कीनसदृश लक्षणे दिसली होती.

त्याचा अहवाल पशुसंवर्धन विभागाने तपासणीसाठी पुणे येथे पाठवला होता. तो तपासणीचा अहवाल लम्पी पॉझिटिव्ह आढळून आल्याने जि.प.चा पशुसंवर्धन विभाग अधिक दक्ष झाला आहे.

मांडवे पंचक्रोशीतील ५ किमी परिसरातील तळे, जैतापूरवाडी, कोसंबीवाडी परिसरातील गुरांचे लसीकरण केले जात आहे. रत्नागिरी जिल्ह्यात प्राथमिक टप्प्यात आतापर्यंत ३५ हजार लसींचे डोस जनावरांसाठी पशुसंवर्धन विभागाकडे उपलब्ध झालेले आहेत.

जिल्ह्यात एकूण २ लाख ७६ हजार पाळीव जनावरे आहेत. या सर्व जनावरांचे लम्पी स्कीनच्या पार्श्वभूमीवर मोफत लसीकरण करण्यात येणार आहे.