Lumpy Skin : उंडवडी सुपेसह पाच गावे ‘लम्पी स्कीन’ मुक्त

उंडवडी सुपे, ता. बारामती ः येथील पशुसंवर्धन दवाखान्यांतर्गत सहा गावांत जनावरांचा लम्पी स्कीन (Lumpy Skin) हा आजार रोखण्यात पशुसंवर्धन विभागाला (Animal Husbandry) यश आले आहे. त्यामुळे परिसरातील शेतकऱ्यांमध्ये समाधानाचे वातावरण आहे.

गेल्या महिनाभरात परिसरातील उंडवडी सुपे, जराडवाडी, खराडेवाडी उंडवडी कडेपठार या चार गावांत सहा जनावरांना लम्पी स्कीन आजाराची लक्षणे आढळून आली होती. त्यामुळे शेतकऱ्यांमध्ये चिंतेचे वातावरण निर्माण झाले होते. लम्पी स्कीनचा अहवाल प्राप्त झाल्यानंतर पशुसंवर्धन विभागाच्या वतीने उंडवडी सुपे, उंडवडी कप, सोनवडी सुपे, जराडवाडी, कारखेल, खराडेवाडी या सहा गावांत जनावरांना मोफत ‘लम्पी’ प्रतिबंधक लसीकरण मोहीम राबविण्यात आली आहे.

सहा गावांतील ६ हजार ५०० जनावरांपैकी ६ हजार १०० जनावरांना सरकारी लस, तर २०० जनावरांना खासगी, तसेच ३०० जनावरांना बारामती दूध संघाच्या वतीने लस देण्यात आली होती. लम्पी स्कीन झालेल्या जनावरांना योग्य व वेळेत उपचार मिळाल्याने एकही जनावर दगावले नाही.

तसेच परिसरात युद्ध पातळीवर लसीकरण झाल्याने लम्पी आजाराचा फैलाव रोखण्यात पशुसंवर्धन विभागाला यश आले आहे. लम्पी लसीकरणाची मोहीम यशस्वी करण्यासाठी पशुधन विस्तार अधिकारी डॉ. आर. आर. पाटील यांचे मोलाचे सहकार्य व मार्गदर्शन मिळाले.

त्यामुळे वेळेत लसीकरण मोहीम यशस्वी झाल्याची माहिती उंडवडी सुपेचे पशुधन पर्यवेक्षक पी. बी. होळकर व परिचालक महेश गायकवाड यांनी दिली.