Lumpy Skin : ‘रोगग्रस्त जनावरांसाठी छावण्या कराव्यात’

कोल्‍हापूर : लम्पी स्कीन रोगाबाधित (Lumpy Skin Disease) जनावरांचे विलगीकरण करून शासनाने त्यांच्यासाठी छावण्या तयार कराव्यात, यासह अन्य मागण्या कोल्‍हापूर जिल्‍हा सहकारी दूध उत्पादक संघ (गोकुळ) (Gokul) ने केल्या आहेत.

अध्यक्ष विश्वास पाटील यांनी जिल्हाधिकारी राहुल रेखावार यांना निवेदन दिले.

बाधित जनावरांचे विलगीकरण करून त्यांच्या छावण्या तयार करणे, ग्रामपंचायतीमार्फत लम्पी स्कीन रोगाबाबत जनजागृती करणे, डास, माश्या, गोचीड प्रतिबंधात्मक कीटकनाशक औषधाची फवारणी करून स्वच्छता मोहीम राबवणे,

गांवामधील लम्पी स्कीन बाधित जनावरांच्या ग्रामपंचायतीमार्फत नोंदी घेऊन पशुसंवर्धन विभागास कळवणे, मृत जनावरांच्या मृतदेहाची शास्त्रोक्त पद्धतीने विल्हेवाट लावण्याची जबाबदारी ग्रामपंचायतीने घ्यावी,

बाहेरून जिल्ह्यामध्ये येणाऱ्या जनावरांचे लम्पी स्कीन प्रतिबंधक लसीकरण केल्याची खात्री करूनच प्रवेश द्यावेत. ही रोग फक्त गाय वर्गामध्ये होत असल्याने बाहेर राज्यांतून

म्हशी खरेदीस शासनामार्फत परवानगी द्यावी, अशा मागण्या गोकुळच्या वतीने करण्यात आल्या आहेत.