Lumpy Skin : ‘लम्पी स्कीन’मुळे आतापर्यंत ३ हजार ९२ पशुधनाचा मृत्यू

पुणे ः ‘लम्पी स्कीन’ आजाराची (Lumpy Skin Infection) लागण झाल्यामुळे राज्यात रविवार (ता. ९) अखेर ३ हजार ९२ पशुधनाचा मृत्यू (Livestock Death) झाला आहे. तर ३२ जिल्ह्यांतील २ हजार ३६८ गावांमधील ७४ हजार ३२९ पशुधन बाधित असून, त्यापैकी ४१ हजार ६१४ पशुधन बरे झाली आहेत. तर सुमारे ८६ टक्के पशुधनाचे लसीकरण पूर्ण झाले असल्याची माहिती पशुसंवर्धन आयुक्त सच्चिंद्रप्रसाद सिंह (Sachhindra Pratap Singh) यांनी दिली.

राज्यात ‘लम्पी स्कीन’चा प्रादुर्भाव आणि लक्षणे जाणवू लागल्यानंतर तातडीने लसीकरणाला सुरुवात केल्याने पशुधनाचा बाधित होण्याचे आणि मृत होण्याचे प्रमाण रोखण्यास मदत झाल्याचे सच्चिंद्रप्रसाद यांनी सांगितले. राज्यातील विविध जिल्ह्यांमध्ये रविवार (ता. ९) अखेर १ कोटी २८ लाख लस उपलब्ध करून देण्यात आली आहे. त्यामधील १ कोटी २० लाख ३९ हजार लाख पशुधनास मोफत लसीकरण करण्यात आले आहे.

तसेच अकोला, जळगाव, कोल्हापूर, सांगली, वाशीम आणि मुंबई उपनगर या जिल्ह्यांमधील लसीकरण पूर्ण झाले आहे. खासगी संस्था, सहकारी दूध संघ आणि वैयक्तिक पशुपालकांनी करून घेतलेले लसीकरण यांच्या आकडेवारीनुसार राज्यात सुमारे ८६ टक्के गोवंशीय पशुधनाचे लसीकरण झाले आहे.

देशात ८५ हजार पशुधनाचा मृत्यू

देशात (१९ ऑक्टोबर) अखेर ८५,६२८ पशुधनाचा मृत्यू झाला आहे. यामध्ये प्रामुख्याने राजस्थानमध्ये ५५ हजार ४४८, पंजाबमध्ये १७ हजार ६५५, गुजरातमध्ये ५ हजार ८५७, हिमाचल प्रदेशमध्ये ४ हजार ३४७ व हरियानामध्ये २ हजार ३२१ पशुधनाचा समावेश आहे. तर महाराष्ट्रात रविवार (ता. ९) अखेर ३ हजार ९२ पशुधनाचा मृत्यू झाला आहे.