Lumpy Skin : सिंधुदुर्ग जिल्ह्यात लम्पी स्कीन आजारामुळे २० जनावरांचा मृत्यू

सिंधुदुर्गनगरी ः जिल्ह्यात लम्पी स्कीन आजाराचा (Lumpy Skin Disease) प्रादुर्भाव वाढत असून, आतापर्यंत ६८९ जनावरांना प्रादुर्भाव झाला असून, त्यातील २० जनावरांचा मृत्यू (Animal Death) झाला आहे. १७ जनावरे गंभीर स्थितीत आहेत. दरम्यान, २९४ जनावरांनी या आजारावर मात केली आहे. दिवसेंदिवस वाढणाऱ्या या आजारामुळे पशुपालकांमध्ये चिंता आहे.

राज्यात ‘लम्पी स्कीन’ने धुमाकूळ घातल्यानंतर या रोगांचा आता सिंधुदुर्ग जिल्ह्यात देखील झपाट्याने फैलाव होत आहे. इतर जिल्ह्यांतील प्रादुर्भाव जाणवू नये म्हणून प्रशासनाने खबरदारी घेतली होती. परंतु तरीदेखील गेल्या महिन्यापासून जिल्ह्यात ‘लम्पी स्कीन’सदृश लक्षणे काही भागांतील जनावरांमध्ये दिसू येऊ लागली.

यासंदर्भातील तपासण्या केल्यानंतर लम्पी स्कीनने जिल्ह्यात प्रवेश केल्याचे स्पष्ट झाले. जिल्ह्यात सध्या कणकवली तालुक्यातील कनेडी परिसर आणि कुडाळ तालुक्यातील माणगाव परिसरात लम्पी स्कीनच्या प्रादुर्भाव अधिक दिसत आहे. जिल्ह्यात आतापर्यंत ६८९ जनावरांना लम्पी स्कीनची लागण झाली आहे. त्यातील २० जनावरांचा मृत्यू झाला आहे. १७ जनावरे गंभीर स्थितीत आहेत. लागण झालेल्या २८९ पैकी २९४ जनावरे पूर्णतः बरी झाली आहेत. उर्वरित ३८० जनावरांवर उपचार सुरू आहेत.

जिल्ह्यात ‘लम्पी स्कीन’चा प्रादुर्भाव झालेल्या जनावरांपैकी २९४ जनावरे बरी झाली आहेत. २० जनावरांचा मृत्यू झाला आहे. उर्वरित जनावरांवर उपचार सुरू आहेत. जनावरांमध्ये काही लक्षणे दिसताच पशुपालकांनी तत्काळ पशुवैद्यकीय अधिकाऱ्यांशी संपर्क साधावा

- डॉ. विद्यानंद देसाई, जिल्हा पशुसंवर्धन अधिकारी, सिंधुदुर्ग