Pune News : राज्यातील अनेक भागात सध्या पावसाचा जोर काहीसा कमी झालेला आहे. तर मराठवाडा आणि विदर्भातील काही भागात पावसाची उघडीप आहे. तर राज्यातील काही ठिकाणी अधून मधून जोरदार सरीही पडत आहेत. हवामान विभागाने पुढील ५ दिवस राज्यातील काही भागात जोरदार पावसाचा अंदाज दिला आहे. 

माॅन्सूनचा ट्रफ सध्या सक्रीय असून आपल्या सर्वसाधारण जागेच्या दक्षिणेकडे झुकलेला आहे. हा ट्रफ पुढील ४ ते ५ दिवसात उत्तरेकडे सरकण्याची शक्यता आहे. तसेच दक्षिण गुजरात ते केरळ दरम्यान किनारपट्टीला समांतर कमी दाबावाचा पट्टा आहे. झारखंड आणि शेजारच्या भागात तसेच अरबी समुद्र आणि सौराष्ट्राच्या भागात चक्राकार वाऱ्याची स्थिती आहे. यामुळे राज्याच्या काही भागात पाऊस पडत आहे. 

हवामान विभागाने आज राज्यातील काही भागात पावसाचा अंदाज दिला. कोकणातील सर्व जिल्हे तसेच मध्य महाराष्ट्रातील कोल्हापूर, सातारा, पुणे, नाशिक, धुळे, नंदूरबार, जळगाव, बुलडाणा, अकोला, अमरावती आणि गडचिरोली जिल्ह्यात काही ठिकाणी जोरदार पावसाचा येलो अलर्ट दिला. नगर, छत्रपती संभाजीनगर, मराठवाडा आणि विदर्भातील काही भागात हलक्या ते मध्यम पावसाचा अंदाजही हवामान विभागाने दिला. 

उद्या राज्यातील काही भाग वगळले तर पावसाची उघडीप राहण्याचा अंदाज आहे. तर गुरुवारपासून पुन्हा कोकण, मध्य महाराष्ट्रातील काही भाग आणि विदर्भात पावसाचा जोर वाढण्याची शक्यता आहे. कोकणातील सिंधुदूर्ग, रत्नागिरी आणि रायगड तर मध्य महाराष्ट्रातील पुणे आणि सातारा तसेच विदर्भातील सर्वच जिल्ह्यांमध्ये काही ठिकाणी जोरदार पावसाचा येलो अलर्ट हवामान विभागाने दिला.