Pune News : राज्याच्या अनेक भागात कमी आधिक प्रमाणात कालपासून पाऊस हजेरी लावत आहे. तर काही कोकण, मध्य महाराष्ट्र आणि विदर्भातील काही भागात जोरदार पाऊस झाला. तर पुढील चार दिवस राज्यातील काही भागात चांगल्या पावसाचा अंदाज हवामान विभागाने दिला. 

हवामान विभागाने आज विदर्भातील बुलडाणा, अकोला, अमरावती, वाशीम, यवतमाळ, वर्धा, नागपूर, चंद्रपूर आणि गडचिरोली जिल्ह्यात काही ठिकाणी जोरदार पावसाचा येलो अलर्ट दिला. तर भंडारा आणि गोंदीया जिल्ह्यात काही ठिकाणी जोरदार पावसाचा ऑरेंज अलर्ट दिला. तर कोकणातील रायगड आणि सातारा जिल्ह्यात काही ठिकाणी अतिजोरदार पावसाचा रेड अलर्ट दिला. 

सिंधुदूर्ग, रत्नागिरी, पालघर जिल्ह्यात आणि मध्य महाराष्ट्रातील कोल्हापूर आणि पुणे जिल्ह्यात काही ठिकाणी जोरदार पावसाचा ऑरेंज अलर्ट देण्यात आला. मराठवाड्यातही छत्रपती संभाजीनगर, जाला, परभणी तसेच नाशिक, जळगाव आणि नगर जिल्ह्यातही काही ठिकाणी जोरदार पावसाचा अंदाज हवामान विभागाने दिला. 

उद्या रत्नागिरी आणि सातारा जिल्ह्यात काही ठिकाणी अतिजोरदार पावसाचा रेड अलर्ट देण्यात आला. तसेच सिंधुदूर्ग, रायगड, कोल्हापूर आणि पुणे जिल्ह्यात काही ठिकाणी जोरदार ते अतिजोरदार पावसाचा ऑरेंज अलर्ट हवामान विभागाने दिला. तसेच विदर्भातील सर्वच जिल्ह्यांमध्ये काही ठिकाणी जोरदार पावसाचा येलो अलर्ट आहे. नाशिक, धुळे आणि नंदूरबार जिल्ह्यातही येलो अलर्ट देण्यात आला. तर मराठवाड्यात काही ठिकाणी हलक्या ते मध्यम सरी पडतील, असाही अंदाज हवामान विभागाने दिला. 

बुधवारी मराठवाडा आणि विदर्भात पावसाचा जोर कमी होण्याची शक्यता आहे. पूर्व विदर्भात मात्र अनेक ठिकाणी हलक्या ते मध्यम सरी पडू शकतात. तसेच कोकणात पावसाचा जोर कायम राहण्याचा अंदाज असून सिंधुदूर्ग, रत्नागिरी, ठाणे, पालघर आणि मुंबई जिल्ह्याला ऑरेंज अलर्ट देण्यात आला. तर मध्य महाराष्ट्रातील पुणे, सातारा जिल्ह्यात जोर कायम राहण्याचा अंदाज आहे. नाशिक, जळगाव, धुळे आणि नंदूरबार जिल्ह्यातही काही ठिकाणी पावसाचा अंदाज हवामान विभागाने दिला. 

गुरुवारी आणि शुक्रवारी कोकण आणि मध्य महाराष्ट्रीतील पुणे, सातारा आणि कोल्हापूर जिल्ह्यात काही ठिकाणी जोरदार पाऊस राहू शकतो. तसेच पूर्व विदर्भातही काही ठिकाणी जोरदार सरी पडतील, असा अंदाज हवामान विभागाने दिला.