Weather Update : हिमाचल प्रदेशात मुसळधार पावसामुळे दरडी कोसळल्याने व अचानक आलेल्या पुरामुळे गेल्या २४ तासांपासून बंद असलेला चंडीगड-मनाली राष्ट्रीय महामार्ग अखेर मंगळवारी (ता. २७) वाहतुकीसाठी खुला झाला.

रविवारी (ता. २५) संध्याकाळपासून हा महामार्ग बंद असल्याने मंडी जिल्ह्यात पर्यटकांसह शेकडो जण अडकून पडले होते. राज्य आपत्कालीन मदत केंद्राच्या माहितीनुसार पावसाशी संबंधित विविध दुर्घटनांत आतापर्यंत नऊ जणांचा मृत्यू झाला आहे.

हिमाचल प्रदेशात अनेक ठिकाणी हलका ते मध्यम पाऊस सुरू असून बुधवारी (ता. २८) आणि गुरुवारी (ता. २९) हवामान खात्याने मेघगर्जनेसह मुसळधार पावसाचा इशारा दिला आहे.

त्याचप्रमाणे शुक्रवारी (ता. ३०) आणि शनिवारी (ता. १) विजांच्या कडकडाटासह पाऊस पडण्याचीही शक्यता वर्तवण्यात आली आहे. बिलासपूरमधील बर्टिनमध्ये ६६ मि.मी, माशोब्रात ४६ मि.मी. तर गोहरमध्ये २८ मि.मी. आणि सिमल्यात २३ मि.मी. पावसाची नोंद झाली.

दरम्यान, मंडी शहरापासून ४० किमी अंतरावरील खोटिनल्लाह येथे अचानक आलेल्या पुरामुळे महामार्गाचा मंडी ते कुलू हा ७० किमीचा टप्पा बंद करण्यात आला होता. त्याचप्रमाणे, सहा मैल परिसरात दरड कोसळल्याने मंडी ते पांडोह हा टप्पाही बंद केला होता.

मात्र, प्रशासनाने दरडीचा ढिगारा काढून स्ता मोकळा केला. त्यानंतर, तब्बल २४ तासांनी हा महामार्ग पुन्हा सुरू झाला. दरम्यान, राज्याचे मुख्य सचिव ओंकारचंद शर्मा(महसूल) यांनी पर्यटकांना नदी तसेच जलाशयांत न जाण्याचा सल्ला दिला असून हवामान खात्याने ॲप डाउनलोड करण्याचीही सूचना केली आहे.

पावसाचा फटका

बंद रस्ते

११६

विस्कळीत पाणीपुरवठा योजना

७०

ट्रान्सफॉर्मरचे नुकसान

१०६

एकूण नुकसान

१०२ कोटी रु.