Pune News : राज्यात मराठवाडा आणि विदर्भात अनेक ठिकाणी पावसाने हजेरी लावल्यानंतर राज्यातील पावसाळी वातावरण आता निवळले. त्यामुळे राज्यातील किमान आणि कमाल तापमानात वाढ झाली.

हवामान विभागाने आज राज्यात ढगाळ हवामानासह उन्हाचा चटका, उकाडा कायम राहण्याचा अंदाज हवामान विभागाने वर्तविला आहे.

पावसाळी वातावरणामुळे काही भागात सकाळी गारवा जाणवत होता. पण पावसाळी वातावरण निवळल्यानंतर पुन्हा एकदा उन्हाचा चटका वाढला. राज्यातील बहुतांशी भागात कमाल तापमान पुन्हा 37 अंश सेल्सिअस दरम्यान पोचले.

तर सोलापूर येथे मागील 24 तासातील उच्चांकी 39 अंश सेल्सिअस तापमानाची नोंद झाली. तर नगर येथे मागील 24 तासातील सर्वात कमी 13.7 अंश सेल्सिअस तापमानाची नोंद झाली.

पश्चिम विदर्भ आणि परिसरावरील चक्राकार वाऱ्यांची स्थिती उत्तर तेलंगणा परिसरावर सक्रिय आहे. या चक्राकार वाऱ्यांपासून दक्षिण केरळपर्यंत हवेचा कमी दाबाचा पट्टा कायम आहे. मध्य प्रदेशापासून दक्षिण आसामपर्यंत हवेचा कमी दाब पट्टा तयार झाला आहे. राज्यात सुरू असलेला वादळी पाऊस उघडीप देण्याचे संकेत आहेत.