Pune News : उत्तरेकडील थंड वाऱ्यांच्या प्रहावामुळे राज्यात थंडी वाढण्याला मदत होत आहे. राज्यात मागील दोन दिवसांपासून थंडी काही प्रमाणात कमी जास्त होत आहे. मात्र पुढील दोन दिवसांमध्ये राज्यात थंडी वाढण्याची शक्यता हवामान विभागाने व्यक्त केली. 

उत्तर भारतातील राज्यांमध्ये अनेक भागात थंडीचा कडाका कमी झालेला दिसत आहे. त्यामुळे किमान तापमानही अधिक दिसत आहे. राजस्थानमधील चित्तोडगड येथे देशातील सपाट भुभागावरील निचांकी ५.९ अंश सेल्सिअस तापमानाची नोंद झाली.

ईशान्य राजस्थान आणि परिसरावर चक्राकार वाऱ्यांची स्थिती आहे. मध्य महाराष्ट्र आणि परिसरावर चक्राकार वारे वाहत आहेत. तर पश्चिमी चक्रवातामुळे उत्तरेकडील राज्यांमध्ये हलक्या पावसासह हिमालय लगतच्या भागात हिमवृष्टी सुरूच आहे.

राज्यातील तापमानातही मागील दोन दिवसांपासून चढ उतार सुरु आहेत. आज जळगाव येथे सर्वात कमी ८.८ अंश सेल्सिअस तापमानाची नोंद झाली. तर निफाड येथील गहू संशोधन केंद्रात ९.८ अंश सेल्सिअस तापमान होते.

राज्यातील १० अंशांपेक्षा कमी तापमान असलेली ठिकाणे कमी दिसत आहेत. बहुतांशी भागात किमान तापमानात वाढ झाली. तर काही भागात दुपारी काहीसा उकाडाही जाणवत असल्याची स्थिती आहे.