Pune News : राज्यात उन्हाळा सुरू झाल्याने उन्हाच्या झळा असह्य होऊ लागल्या आहेत. उन्हाची ताप वाढल्याने विदर्भ भाजून निघाला आहे. विदर्भातील अकोला येथे राज्याचे यंदाच्या हंगामातील उच्चांकी ४१ अंश सेल्सिअस तापमानाची नोंद झाली आहे. आज (ता. २७) राज्यात कमाल तापमानातील वाढ कायम राहण्याची शक्यता हवामान विभागाने वर्तविला आहे.

पूर्व विदर्भापासून उत्तर अंतर्गत कर्नाटक पर्यंत समुद्र सपाटीपासून १.५ किलोमीटर उंचीवर हवेचा कमी दाबाचा पट्टा सक्रिय आहे. राज्यात अंशतः ढगाळ हवामान होत आहेत. तर उन्हाचा चटका वाढतच असून, दुपारच्या वेळी झळा असह्य होत उकाड्यात वाढ झाली आहे.

मंगळवारी (ता. २६) सकाळपर्यंतच्या २४ तासांमध्ये अकोला देशात उष्ण ठरले असून, अकोल्यात राज्याचे हंगामातील उच्चांकी ४१ अंश सेल्सिअस तापमान नोंदले गेले. वर्धा, अमरावती, मालेगाव, सोलापूर, यवतमाळ आणि परभणी येथे तापमान चाळीशीपार आहे. तर राज्यात बहुतांश ठिकाणी कमाल तापमान ३८ अंशांच्या पुढे आहे. राज्याच्या कमाल तापमानात आणखी वाढ होण्याची शक्यता वर्तविण्यात आली आहे.

मंगळवारी (ता. २६) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअस मध्ये) :

पुणे ३८.९, धुळे ३९.०, जळगाव ३९.८, कोल्हापूर ३७.७, महाबळेश्वर ३३.१, मालेगाव ४०.८, नाशिक ३७.७, निफाड ३६.८, सांगली ३८.७, सातारा ३८.४, सोलापूर ४०.६, सांताक्रूझ ३३.६, डहाणू ३३.४, रत्नागिरी ३३.५,

छत्रपती संभाजीनगर ३८.२, नांदेड ३९.४, परभणी ४०.०, अकोला ४१.०, अमरावती ४०.८, बुलडाणा ३८.०, ब्रह्मपुरी ३९.२, चंद्रपूर ३८.२, गडचिरोली ३६.०, गोंदिया ३७.८, नागपूर ३९.०, वर्धा ४०.८, वाशीम ३९.८, यवतमाळ ४०.२.

४० अंशांपेक्षा अधिक कमाल तापमान असलेली ठिकाणे :

अकोला ४१, वर्धा ४०.८, अमरावती ४०.८, मालेगाव ४०.८, सोलापूर ४०.६, यवतमाळ ४०.२, परभणी ४०.