Pune News : पाकिस्तानवरून वाहणाऱ्या थंड वाऱ्यांमुळे उत्तर भारत थंडीची लाट आहे. राज्यातही थंडी वाढली आहे. उत्तर महाराष्ट्रासह विदर्भात मागील तीन दिवसांपासून गारठा वाढला. आज धुळे येथील कृषी महाविद्यालयात राज्याच्या नीचांकी ५.८ अंश तापमानाची नोंद झाली आहे. राज्यात थंडी कायम राहील, असा अंदाज हवामान विभागाने वर्तविला.

पश्‍चिमी चक्रावात आणि पश्‍चिमेकडून वाहणाऱ्या जोरदार वाऱ्यांमुळे देशाच्या उत्तरेकडील राज्यांमध्ये थंडी चांगलीच वाढली. आज पूर्व राजस्थानच्या ‘सिकार’ येथे देशाच्या सपाट भूभागावरील हंगामातील नीचांकी १ अंश सेल्सिअस तापमानाची नोंद झाली. राज्यातही गारठा वाढत आहे. धुळ्यासह, परभणी, नागपूर, निफाड, गोंदिया, वर्धा येथे तापमान १० अंशांच्या खाली आले आहे.

राज्यात थंडीचा कडाका कायम असतानाच काही ठिकाणी कमाल तापमानही ३५ अंशाच्या दरम्यान आहे. आज मुंबईतील सांताक्रुझ येथे कमाल ३५.६ अंश सेल्सिअस तापमानाची नोंद झाली. तसेच डहाणू येथेही ३५.१ अंश तापमान होते. रत्नागिरीतही ३५.१ अंश सेल्सिअस तापमनाची नोंद झाली. 

सध्य मध्य महाराष्ट्र, उत्तर महाराष्ट्र, मराठवाड्याचा बहुतांशी भाग आणि विदर्भात थंडीचा कडाका चांगलाच वाढला. थंडी पुढील काही दिवस कायम राहू शकते, असा अंदाज हवामान विभागाने दिला.