Pune News : राज्याच्या काही भागात तापमानात चढ उतार सुरुच आहेत. राज्यात पहिल्यांदाच तापमान १० अंशाच्या खाली गेले असून वसंतराव नाईक मराठवाडा कृषी विद्यापीठात ९.६ अंश सेल्सिअस तापमानाची नोंद झाली. पुढील काळात राज्यातील अनके भागात तापमानातील चढ उतार कायम राहिल. तर काही ठिकाणी थंडीचा कडाका आणखी वाढण्याचा अंदाज आहे.

महाराष्ट्रावर आज हवेचा दाब अधिक राहण्याचा अंदाज आहे. त्यामुळे थंडीत चढ- उतार जाणवत आहे. हवेच्या दाबात वाढ होताच किमान व कमाल तापमानात घट होऊन थंडीची तीव्रता वाढते. राज्याच्या बहुतांश भागात वाऱ्याची दिशा ईशान्येकडून राहील. ईशान्येकडून येणारे थंड वारे थंडीची तीव्रता वाढवतील. त्याच वेळी राज्याच्या सर्व भागांत दुपारच्या सापेक्ष आर्द्रतेत घट होईल.

निफाड येथील गहू संशोधन केंद्र आणि धुळे येथे आजही १० अंश सेल्सिअस तापमानाची नोंद झाली. तर वसंतराव नाईक मराठवाडा कृषी विद्यापिठात यंदाच्या हंगामातील सर्वात कमी ९.६ अंश सेल्सिअस तापमानाची नोंद झाली. तापमानात काहीसे चढ उतार राहू शकतात, असा अंदाज हवामान विभागाने दिला.

हवामान कोरडे व थंड राहण्याचा अंदाज आहे. ज्या भागात सकाळची सापेक्ष आर्द्रता अधिक असेल, तिथे पहाटेपासून सकाळपर्यंत मोठ्या प्रमाणात धुके जाणवेल. राज्यातील बहुतांशी भागात थंडी वाढत आहे. अनेक ठिकाणी तापमान १५ अंशांपेक्षाही कमी आहे. तर १३ अंशांपेक्षा कमी तापमान असलेल्या ठिकाणांचीही संख्या लक्षणीय आहे.

श्रीलंकेपासून पूर्वेस हवेच्या कमी दाबाचे क्षेत्र निर्माण होण्याची शक्यता आहे. हे क्षत्र उद्या पश्‍चिम दिशेस सरकून त्याचा केंद्रबिंदू श्रीलंकेवर राहण्याचा अंदाज आहे. बुधवार हे लहानसे चक्रिय वादळ विरून जाणार असल्याने त्याचा परिणाम महाराष्ट्रावर होणार नाही, असाही अंदाज हवामान विभागाने दिला.