Vidarbha Weather Update : विदर्भातील काही भागात आज हलक्या ते मध्यम स्वरुपाच्या सरी पडत आहेत. पण राज्याच्या बहुतांशी भागात पावसाने दडी दिली. अधूनमधून ढगाळ वातावरण दिसत असले तरी उन्हाचा चटका तापदायक ठरत आहे. हवामान विभागाने उद्या विदर्भ आणि मराठवड्यात काही ठिकाणी जोरदार पावसाचा अंदाज दिला.

हवामान विभागाने आज विदर्भातील संपूर्ण जिल्ह्यांमध्ये ठिकठिकाणी जोरदार पावसाचा अंदाज दिला होता. मात्र काही ठिकाणी हलक्या सरी पडल्या. तर हवामान विभागाने उद्याही विदर्भ आणि मराठवाड्यातील काही भागांमध्ये जोरदार पावसाचा अंदाज दिला. विदर्भातील गडचिरोली, भंडारा आणि गोंदीया या जिल्ह्यांमध्ये अनेक ठिकाणी ढगांच्या गडगडाटासह जोरदार पावसाचा ऑरेंज अलर्ट दिला. तर बुलडाणा, वाशीम, अकोला, अमरावती, नागपूर, चंद्रपूर आणि वर्धा या जिल्ह्यांमध्ये काही ठिकाणी जोरदार पावसाचा अंदाज हवामान विभागाने दिला.

तसेच मराठवड्यातील छत्रपती संभाजीनगर, जालना, परभणी, हिंगोली आणि नांदेड जिल्ह्यातही काही ठिकाणी जोरदार पावसाचा अंदाज हवामान विभागाने दिला. तर खानदेशातील जळगाव आणि धुळे जिल्ह्यातही ठिकठिकाणी विजांसह हलक्या ते मध्यम पावसाचा अंदाज आहे. तर मध्य महाराष्ट्र आणि कोकणातील जिल्ह्यांमध्ये काही ठिकाणी हलक्या ते मध्यम पावसाचा इशाराही हवामान विभागाने दिला.

शुक्रवारी विदर्भातील अमरावती, वर्धा आणि नागपूर जिल्ह्यात अनेक ठिकाणी जोरदार पावसाचा ऑरेंज अलर्ट हवामान विभागाने दिला.  तर विदर्भातील इतर जिल्ह्यांमध्ये काही ठिकाणी विजांसह जोरदार पावसाचा अंदाजही हवामान विभागाने दिला. तसेच मराठवड्यातील छत्रपती संभाजीनगर, जालना, नांदेड, परभणी आणि हिंगोली तसेच खानदेश आणि मध्य महाराष्ट्रातील पुणे आणि सातारा जिल्ह्यातही ठिकठिकाणी जोरदार पावसाचा येलो अलर्ट देण्यात आला.