Pune News : राज्यात मागील काही दिवसांपासून पाऊस आणि उष्णतेच्या लाटेचा अनुभव वेगवेगळ्या भागांना येत आहे. मराठवाडा आणि विदर्भात काही ठिकाणी पावसानेही मागील सात दिवसांपासून हजेरी लावली आहे. हवामान विभागाने आज आणि उद्या काही भागात गारपीट, पाऊस आणि उष्णतेच्या लाटेचा इशारा दिला.

हवामान विभागाने आज रायगड, ठाणे, पालघर आणि मुंबई, नाशिक, धुळे, जळगाव, आणि नंदूरबार जिल्ह्यात काही ठिकाणी उष्णतेच्या लाटेचा इशारा दिला.

तर पुणे, रत्नागिरी, सिंधुदूर्ग, सातारा, कोल्हापूर, नगर, बीड, धाराशिव, लातूर, नांदेड, हिंगोली आणि परभणी जिल्ह्यात काही ठिकाणी विजा आणि मेघगर्जनेसह हलक्या पावसाचा अंदाज दिला. तर जालना आणि छत्रपती संभाजीनगर जिल्ह्यातही काही ठिकाणी हलक्या सरी पडतील, असाही अंदाज दिला. 

उद्या रत्नागिरी, रायगड, ठाणे आणि मुंबई जिल्ह्यात उष्णतेच्या लाटेचा इशारा दिला. तर नाशिक, धुळे, नंदूरबार, नांदेड, यवतमाळ, वर्धा, चंद्रपूर आणि गडचिरोली या जिल्ह्यांमध्ये विजा आणि मेघगर्जनेसह हलक्या पावसाचा अंदाज हवामान विभागाने दिला.

तर सोलापूर, धाराशिव, लातूर, छत्रपती संभाजीनगर आणि जळगाव जिल्ह्यात हलक्या पावसाच्या सरी पडतील, असाही अंदाज हवामान विभागाने दिला.