Pune News: माॅन्सूनने आजही प्रगती केली नाही. मात्र राज्यात काही ठिकाणी पावसासाठी पोषक हवामान झाले आहे. विदर्भ आणि मराठवाड्यातील काही भागात जोरदार पावसाचा अंदाज आहे. कोकण तसेच मध्य महाराष्ट्रातही काही ठिकाणी मुसळधारेचा अंदाज हवामान विभागाने दिला. 

राज्यात माॅन्सून गेल्या १२ दिवसांपासून एकाच भागात आहे. माॅन्सूनची सिमा आजही मुंबई, अहिल्यानगर, अदिलाबाद, भवानीपटना, पुरी आणि बालूरघाट परिसरात आहे. माॅन्सूनच्या प्रगतीसाठी पोषक हवामान नाही. त्यामुळे माॅन्सून एकाच भागात आहे. तर राज्यात पावसासाठी पोषक आहे. त्यामुळे विदर्भ, मराठवाडा, आणि मध्य महाराष्ट्रातील काही भागात पावसाचा जोर काहीसा अधिक राहण्याची शक्यता आहे. 

हवामान विभागाने पुढील ५ दिवस विदर्भातील बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदीया, गडचिरोली आणि चंद्रपूर जिल्ह्यातील काही ठिकाणी हलक्या ते जोरदार पावसाचा अंदाज आहे. अनेक भागात पावसाचा येलो अलर्टही देण्यात आला.

मराठवाड्यातील परभणी, बीड, लातूर, धाराशिव, नांदेड आणि हिंगोली जिल्ह्यात पुढील ५ दिवस काही ठिकाणी मध्यम ते जोरदार पावसाचा अंदाज आहे. तर छत्रपती संभाजीनगर आणि जालना जिल्ह्यातही काही ठिकाणी हलक्या ते मध्यम पावसाची शक्यता आहे. मध्य महाराष्ट्रातील पुणे, अहिल्यानगर, सातारा, सांगली, कोल्हापूर आणि सोलापूर जिल्ह्यात काही ठिकाणी जोरदार पावसाचा अंदाज आहे.

पुढील ५ दिवस काही ठिकाणी पावसाची शक्यता असल्याचे हवामान विभागाने म्हटले आहे. नाशिक, धुळे, जळगाव आणि नंदूरबार जिल्ह्यातही काही ठिकाणी पावसाचा अंदाज आहे. कोकणातील सर्व जिल्ह्यांमध्येही काही ठिकाणी हलक्या ते मध्यम पावसाचाही अंदाज हवामान विभागाने दिला.