Maharashtra Weather Update: महाराष्ट्रावर आज व उद्या (ता. ८ व ९) हवेचे दाब १००८ हेप्टापास्कलपर्यंत वाढण्याची शक्यता आहे. त्यामुळे पावसात उघडीप आणि सूर्यप्रकाश असे हवामान राहील. मात्र मंगळवारी (ता.१०) महाराष्ट्राच्या उत्तर भागावर १००६ हेप्टापास्कल आणि दक्षिण भागावर १००८ हेप्टापास्कल इतका हवेचा दाब होताच, महाराष्ट्राच्या उत्तर भागावर कमी दाबाचे क्षेत्र तयार होण्यास सुरुवात होईल. बुधवार व गुरुवार (ता. ११, १२) हवेचे दाब १००४ हेप्टापास्कल होताच, संपूर्ण महाराष्ट्रावर हवेच्या कमी दाबाचे क्षेत्र निर्माण होऊन पावसाच्या प्रमाणात वाढ होईल. तर शुक्रवार व शनिवारी (ता. १३, १४) हवेचे दाब आणखी कमी होतील. हवेचे दाब १००२ हेप्टापास्कल इतके होताच हवेच्या तीव्र कमी दाबाचे क्षेत्र निर्माण होऊन पावसाच्या प्रमाणात वाढ होईल. जेथे हवेच्या कमी दाबाचे क्षेत्र तीव्र होईल, तेथे जोराचे पाऊस होतील. त्यातूनच या आठवड्यात मॉन्सूनचे पुनरागमन होईल.
कोकण, उत्तर महाराष्ट्र, विदर्भात व पश्‍चिम महाराष्ट्रात वाऱ्याची दिशा नैॡत्येकडून राहील. धुळे, नंदुरबार, बुलडाणा, अकोला, वाशीम, वर्धा, भंडारा या वाऱ्याचा ताशी वेग २० कि.मी.पेक्षा अधिक राहील. अमरावती, वर्धा, नागपूर, चंद्रपूर, गडचिरोली, भंडारा, गोंदिया या सर्व जिल्ह्यांत कमाल तापमान ४० अंश सेल्सिअसपेक्षा अधिक राहील. आकाश ढगाळ राहील. आज व उद्या सर्वच जिल्ह्यांत तुरळक ठिकाणी हलक्या पावसाची शक्यता राहील.
हिंदी महासागराच्या पाण्याच्या पृष्ठभागाचे तापमान ३० ते ३१ अंश सेल्सिअस राहील. अरबी समुद्राच्या पाण्याच्या पृष्ठभागाचे तापमान २७ ते २८ अंश सेल्सिअस काही भागात, तर थोड्या भागांत ३० अंश सेल्सिअस राहील. तर बंगालच्या उपसागराच्या पाण्याचे पृष्ठभागाचे तापमान थोड्याफार भागात ३० ते ३१ अंश सेल्सिअसपर्यंत वाढेल. या सर्वांचा परिणाम म्हणून बाष्पीभवनाचा वेग कायम वाढता राहून ढगनिर्मिती मोठ्या प्रमाणात होईल. तसेच प्रशांत महासागराच्या पेरूजवळ समुद्राच्या पाण्याचे पृष्ठभागाचे तापमान १६ अंश सेल्सिअस, तर इक्वेडोरजवळ ते २५ अंश सेल्सिअस राहील. त्यामुळे तिकडे हवेचे दाब वाढते राहतील आणि सौम्य ‘ला-निना’चा परिणाम जाणवेल आणि पावसात सातत्य राहील.
कोकण
आज (ता.८) रत्नागिरी व रायगड जिल्ह्यांत ८ मि.मी., सिंधुदुर्ग व ठाणे जिल्ह्यांत ५ मि.मी. आणि पालघर जिल्ह्यात ३ मि.मी. पावसाची शक्यता आहे. वाऱ्याची दिशा रायगड, ठाणे व पालघर जिल्ह्यांत नैॡत्येकडून, तर रत्नागिरी जिल्ह्यात पूर्वेकडून आणि सिंधुदुर्ग जिल्ह्यात वायव्येकडून राहील. सिंधुदुर्ग, रत्नागिरी, रायगड व ठाणे जिल्ह्यात वाऱ्याचा ताशी वेग १ ते ४ कि.मी. इतका कमी. तर पालघर जिल्ह्यात ताशी ७ कि.मी. राहील.
कमाल तापमान सिंधुदुर्ग जिल्ह्यात ३२ अंश सेल्सिअस, रत्नागिरी व पालघर जिल्ह्यांत ३३ अंश सेल्सिअस, तर ठाणे व रायगड जिल्ह्यांत ३४ अंश सेल्सिअस राहील. किमान तापमान सिंधुदुर्ग व ठाणे जिल्ह्यांत २५ अंश सेल्सिअस, तर पालघर जिल्ह्यात २६ अंश सेल्सिअस आणि रायगड जिल्ह्यात २७ अंश सेल्सिअस राहील. सर्वच जिल्ह्यांत आकाश अंशतः ढगाळ राहील. सकाळची सापेक्ष आर्द्रता रायगड जिल्ह्यात ९४ टक्के, सिंधुदुर्ग व रत्नागिरी जिल्ह्यांत ८५ ते ८८ टक्के, तर ठाणे व पालघर जिल्ह्यांत ७६ ते ७८ टक्के राहील. दुपारची सापेक्ष आर्द्रता ७१ ते ७९ टक्के राहील.
उत्तर महाराष्ट्र
आज (ता.८) जळगाव जिल्ह्यात ९ मि.मी., नाशिक व धुळे जिल्ह्यात ५ मि.मी. आणि नंदुरबार जिल्ह्यात २ मि.मी. पावसाची शक्यता आहे. वाऱ्याची दिशा नैॡत्येकडून राहील. वाऱ्याचा ताशी वेग जळगाव जिल्ह्यात १५ कि.मी., नाशिक जिल्ह्यात १७ कि.मी. आणि धुळे व नंदुरबार जिल्ह्यांत ताशी २० कि.मी. राहील. कमाल तापमान नाशिक जिल्ह्यात ३६ अंश सेल्सिअस, धुळे व नंदुरबार जिल्ह्यांत ३८ अंश सेल्सिअस आणि जळगाव जिल्ह्यात ३९ अंश सेल्सिअस राहील. किमान तापमान २३ अंश सेल्सिअस राहील. सर्वच जिल्ह्यांत आकाश ढगाळ राहील. सकाळची सापेक्ष आर्द्रता ७३ ते ७५ टक्के, तर दुपारची सापेक्ष आर्द्रता ५० ते ५९ टक्के राहील.
मराठवाडा
आज (ता.८) बीड जिल्ह्यात ३ मि.मी., धाराशिव व लातूर जिल्ह्यांत ५ मि.मी., परभणी जिल्ह्यात ७ मि.मी., तर नांदेड व छत्रपती संभाजीनगर जिल्ह्यांत ९ मि.मी., हिंगोली जिल्ह्यात ११ मि.मी. आणि जालना जिल्ह्यात १२ मि.मी. पावसाची शक्यता आहे. वाऱ्याची दिशा वायव्येकडून राहण्यामुळे पावसाचे प्रमाण सर्वच जिल्ह्यांत साधारणच राहील. वाऱ्याचा ताशी वेग लातूर, बीड जिल्ह्यांत ताशी १७ कि.मी. तर नांदेड, हिंगोली व छत्रपती संभाजीनगर जिल्ह्यांत ताशी १८ कि.मी. राहील. वाऱ्याचा ताशी वेग धाराशिव, परभणी व जालना जिल्ह्यांत १९ कि.मी. राहील. कमाल तापमान लातूर जिल्ह्यात ३४ अंश सेल्सिअस,
तर धाराशिव, बीड व छत्रपती संभाजीनगर जिल्ह्यांत ३६ अंश सेल्सिअस राहील. नांदेड, परभणी, हिंगोली व जालना जिल्ह्यांत कमाल तापमान ३७ अंश सेल्सिअस राहील. किमान तापमान बीड, जालना व छत्रपती संभाजीनगर जिल्ह्यांत २४ अंश सेल्सिअस, तर धाराशिव, नांदेड, परभणी, हिंगोली जिल्ह्यांत २५ अंश सेल्सिअस राहील. किमान तापमान लातूर जिल्ह्यात २६ अंश सेल्सिअस राहील. आकाश अंशतः ढगाळ राहील. सकाळची सापेक्ष आर्द्रता लातूर, परभणी व हिंगोली जिल्ह्यांत ५८ टक्के, तर धाराशिव, नांदेड, बीड जिल्ह्यांत ६५ टक्के, जालना व छत्रपती संभाजीनगर जिल्ह्यात ७१ ते ७६ टक्के राहील. दुपारची सापेक्ष आर्द्रता ४४ ते ५५ टक्के राहील.
पश्‍चिम विदर्भ
आज (ता.८) अकोला जिल्ह्यात १० मि.मी. पावसाची शक्यता आहे. बुलडाणा, अकोला, वाशीम व अमरावती जिल्ह्यांत वाऱ्याची दिशा नैॡत्येकडून राहील. वाऱ्याचा ताशी वेग अमरावती जिल्ह्यात १८ कि.मी., तर बुलडाणा जिल्ह्यात ताशी २० कि.मी., वाशीम जिल्ह्यात २२ कि.मी. आणि अकोला जिल्ह्यात २६ कि.मी. राहील. कमाल तापमान बुलडाणा जिल्ह्यात ३६ अंश सेल्सिअस, वाशीम जिल्ह्यात ३७ अंश सेल्सिअस, अकोला जिल्ह्यात ३८ अंश सेल्सिअस आणि अमरावती जिल्ह्यात ४० अंश सेल्सिअस राहील. किमान तापमान सर्वच जिल्ह्यांत २६ ते २७ अंश सेल्सिअस राहील. सकाळची सापेक्ष आर्द्रता अकोला व अमरावती जिल्ह्यांत ६६ ते ६८ टक्के, तर बुलडाणा व वाशीम जिल्ह्यांत ७० ते ८० टक्के राहील. दुपारची सापेक्ष आर्द्रता सर्वच जिल्ह्यात ५१ ते ६० टक्के राहील.
मध्य विदर्भ
कमाल तापमान यवतमाळ जिल्ह्यात ३९ अंश सेल्सिअस, तर वर्धा जिल्ह्यात ४० अंश सेल्सिअस आणि नागपूर जिल्ह्यात ४१ अंश सेल्सिअस राहील. किमान तापमान यवतमाळ व वर्धा जिल्ह्यात २७ अंश सेल्सिअस, तर नागपूर जिल्ह्यात २८ अंश सेल्सिअस राहील. सर्वच जिल्ह्यांत आकाश ढगाळ राहील. सकाळची सापेक्ष आर्द्रता ७० ते ७६ टक्के राहील. दुपारची सापेक्ष आर्द्रता यवतमाळ जिल्ह्यात ४२ टक्के, तर वर्धा व नागपूर जिल्ह्यांत ५८ ते ५९ टक्के राहील. वाऱ्याचा ताशी वेग १८ ते २२ कि.मी. राहील. वाऱ्याची दिशा नैॡत्येकडून राहील.
पूर्व विदर्भ
आज (ता.८) चंद्रपूर जिल्ह्यात ८ कि.मी., गोंदिया जिल्ह्यात ११ मि.मी. आणि गडचिरोली जिल्ह्यात १२ मि.मी. पावसाची शक्यता आहे. वाऱ्याची दिशा सर्वच जिल्ह्यात नैॡत्येकडून राहील. वाऱ्याचा ताशी वेग गडचिरोली जिल्ह्यात ११ कि.मी., चंद्रपूर जिल्ह्यात ताशी १४ कि.मी. राहील. वाऱ्याचा ताशी वेग गोंदिया जिल्ह्यात ताशी १८ कि.मी., तर भंडारा जिल्ह्यात ताशी २० कि.मी. राहील. कमाल तापमान गडचिरोली, भंडारा आणि गोंदिया जिल्ह्यांत ४० अंश सेल्सिअस,
तर चंद्रपूर जिल्ह्यात ४१ अंश सेल्सिअस राहील. किमान तापमान गडचिरोली व गोंदिया जिल्ह्यांत २७ अंश सेल्सिअस, तर चंद्रपूर व भंडारा जिल्ह्यांत २८ अंश सेल्सिअस राहील. आकाश अंशतः ढगाळ राहील. सकाळची सापेक्ष आर्द्रता भंडारा आणि गोंदिया जिल्ह्यांत ५८ ते ६६ टक्के, तर चंद्रपूर व गडचिरोली जिल्ह्यांत ७२ ते ७४ टक्के राहील. दुपारची सापेक्ष आर्द्रता सर्वच जिल्ह्यांत ४५ टक्के राहील.
पश्‍चिम महाराष्ट्र
आज (ता.८) सांगली जिल्ह्यात २ मि.मी., सोलापूर जिल्ह्यात ४ मि.मी., तर कोल्हापूर, सातारा व पुणे जिल्ह्यांत ६ मि.मी., अहिल्यानगर जिल्ह्यात ७ मि.मी. पावसाची शक्यता आहे. कोल्हापूर, सांगली, सातारा व पुणे जिल्ह्यांत वाऱ्याची दिशा नैॡत्येकडून राहील. सोलापूर व अहिल्यानगर जिल्ह्यांत वाऱ्याची दिशा वायव्येकडून राहील. वाऱ्याचा ताशी वेग कोल्हापूर व सातारा जिल्ह्यांत ताशी १० ते ११ कि.मी. राहील.
पुणे व अहिल्यानगर जिल्ह्यात ताशी १४ ते १५ कि.मी., तर सांगली जिल्ह्यात ताशी १६ कि.मी. राहील. कमाल तापमान कोल्हापूर जिल्ह्यात ३३ अंश सेल्सिअस, तर सांगली, सातारा, पुणे व अहिल्यानगर जिल्ह्यांत ३४ अंश सेल्सिअस आणि सोलापूर जिल्ह्यात ३६ अंश सेल्सिअस राहील. किमान तापमान सांगली जिल्ह्यात २३ अंश सेल्सिअस, कोल्हापूर, पुणे व अहिल्यानगर जिल्ह्यांत २४ अंश सेल्सिअस आणि सोलापूर जिल्ह्यात २५ अंश सेल्सिअस राहील. सर्वच जिल्ह्यांत आकाश ढगाळ राहील. सर्वच जिल्ह्यात सकाळची सापेक्ष आर्द्रता ७५ ते ८४ टक्के, तर दुपारची सापेक्ष आर्द्रता ५५ ते ६० टक्के राहील.
कृषी सल्ला
हलक्या, भरड व उथळ जमिनीत कुळीथ, चवळी, मूग, घेवडा, मटकी, उडीद पेरणी पुरेशी ओल असताना करावी.
मध्यम खोल जमिनीत पुरेशी ओल असताना सोयाबीन, तूर, सूर्यफूल, मका, ज्वारी या पिकांच्या पेरण्या कराव्यात.
खोल जमिनीत पुरेशी ओल असताना कपाशी लागवड, हळद व आले लागवडीचे काम पूर्ण करावे.
फळबागांच्या रोपांची लागवड करावी.
(ज्येष्ठ कृषी हवामान तज्ज्ञ,सदस्य, ॲग्रिकल्चर मेटरॉलॉजी फोरम फॉर साउथ आशिया)
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
