Pune News : मागील दोन दिवसांमध्ये राज्यातील काही भागात अवकाळी पाऊस झाला. तर नांदेड आणि यवतमाळ जिल्ह्यात काही ठिकाणी गारपीटही झाली. हवामान विभागाने आजही राज्यातील काही भागात पावसाचा अंदाज दिला.

नांदेड जिल्ह्यातील हिमायतनगर, मुदखेड, उमरी, हदगाव, भोकर तालुक्यात रविवारी सायंकाळी वादळी वाऱ्यासह अवकाळी पाऊस झाला. पावसादरम्यान अनेक भागात गारपीट झाल्याने रब्बीतील गहू, हरभरा, ज्वारी या पिकांचे नुकसान झाले.

तर यवतमाळ जिल्ह्यातील बाभूळगाव तालुक्यात शनिवारी अवकाळी पाऊस तसेच गारपिटीने १७ गावांना फटका बसला. रब्बी हंगामातील गहू, हरभरा, तूर तसेच संत्रा आदी अडीच हजार हेक्टरवरील पिकांचे नुकसान झाले. तसेच विदर्भातील अनेक भागात ढगाळ वातावरण होते.

हवामान विभागाने आजही राज्यातील काही भागात हलक्या पावसाचा अंदाज दिला. मराठवड्यातील हिंगोली, नांदेड जिल्ह्यात काही ठिकाणी आज हलक्या पावसाचा अंदाज देण्यात आला. तर विदर्भातील भंडारा, गोंदीया आणि नागपूर जिल्ह्यात काही ठिकाणी ढगांच्या गडगडाटासह आणि विजांसह हलक्या पावसाचा येलो अलर्ट हवामान विभागाने दिला.