Monsoon Back : माॅन्सूनने देशातील आणखी भागातून आज काढता पाय घेतला. माॅन्सूनने आज परतीच्या प्रवासाचा मोठा टप्पा पार केला. तर राज्यातील काही भागात आज पावसाचा अंदाज हवामान विभागाने दिला.

हवामान विभागाने आज कोकणातील सिंधुदुर्ग आणि रत्नागिरी जिल्ह्यात काही ठिकाणी पावसाचा अंदाज व्यक्त केला. सिंधुदुर्ग जिल्ह्यात ठिकठिकाणी जोरदार पावसाचा येलो अलर्ट देण्यात आला. तर रत्नागिरी जिल्ह्यात काही ठिकाणी विजांसह हलक्या सरी पडतील, असाही अंदाज हवामान विभागाने दिला. तसेच कोल्हापूर जिल्ह्यातही काही भागात हलक्या ते मध्यम सरी पडतील, असा अंदाज हवामान विभागाने दिला.

माॅन्सूनने आज देशातील आणखी काही भागातून माघार घेतली आहे. आज झारखंड आणि छत्तीसगडच्या उर्वरित भागातून माॅन्सून माघारी फिरला. तर पश्चिम बंगालचा बहुतांशी भाग, आंध्र प्रदेशचा किनारी भाग, तेलंगणाचा बहुतांशी भाग आणि कर्नाटकच्या काही  भागातून माॅन्सूनने माघार घेतली आहे. महाराष्ट्रातील सिंधुदूर्ग जिल्ह्याच्या काही भागात माॅन्सून आहे. सध्या माॅन्सूनची सीमा फोरबेसगंज, माल्दा, विशाखापट्टनम, नालगोंडा, रायचूर आणि वेंगुर्ला या भागात आहे.