Pune News : राज्याच्या काही भागात जोरदार पाऊस पडत आहे. तर काही ठिकाणी ऊन सावल्यांचा खेळ सुरु असल्याचे दिसते. हवामान विभागाने आणखी दोन दिवस राज्यातील काही भागात जोरदार पावसाचा अंदाज दिला.

हवामान विभागाने आज राज्यभारत सर्वच जिल्ह्यांमध्ये काही भागात जोरदार पावसाचा येलो अलर्ट दिला. विदर्भ, मध्य महाराष्ट्र, कोकण आणि मराठवाड्यातील काही ठिकाणी जोर काहीसा अधिक राहण्याचा अंदाज आहे. उद्या म्हणजेच शुक्रवारी विदर्भ, मराठवाडा, मध्य महाराष्ट्र आणि कोकणातील काही जिल्ह्यांना काही भागात जोरदार पावसाचा येलो अलर्ट हवामान विभागाने दिला. राज्यभरात विजांसह हलक्या ते मध्यम पावसाचाही अंदाज देण्यात आला. 

शनिवारी राज्यात पावसाचा जोर काहीसा कमी होण्याची शक्यता आहे. विदर्भातील वर्धा, नागपूर, चंद्रपूर, गडचिरोली, भंडारा आणि गोंदीया तसेच वाशीम जिल्ह्यात काही ठिकाणी जोरदार पावसाचा अंदाज आहे. तर मराठवाड्यातील बहुतांशी भागात पावसाची उघडीप राहण्याची शक्यता आहे. मध्य महाराष्ट्रातील कोल्हापूर, सातारा, पुणे आणि नाशिक जिल्ह्यातही काही ठिकाणी जोरदार पावसाचा येलो अलर्ट हवामान विभागाने दिला. 

रविवारी विदर्भात पुन्हा पाऊस वाढण्याचा अंदाज आहे. तर पूर्व विदर्भातील काही भागात अतिजोरदार पावसाचाही अंदाज देण्यात आला. विदर्भातील सर्वच जिल्ह्यांमध्ये रविवारी पावसाचा जोर वाढू शकतो, असा अंदाज आहे. मराठवाड्यात पावसाची विश्रांती राहण्याचा अंदाज आहे. तर मध्य महाराष्ट्रात काही ठिकाणी पावसाचा अंदाज आहे. कोकणात रविवारी पावसाचा जोर वाढण्याचाही अंदाज हवामान विभागाने दिला.