Pune News : नैर्ऋत्य मोसमी वारे (मॉन्सून) महाराष्ट्राच्या प्रवेशद्वारावर असलेल्या गोव्यात दाखल झाला आहे. मॉन्सूनचे आगमन अवघ्या काही तासांवर आले असतानाच, महाराष्ट्रावर पूर्व मोसमी पावसाच्या ढगांची छाया पसरली आहे. आज (ता. ५) राज्यात वादळी वाऱ्यांसह पावसाचा इशारा (येलो अलर्ट) हवामान विभागाने वर्तविला आहे.

पूर्व मोसमी पावसाला पोषक हवामान, ढगाळ आकाश यामुळे कमाल तापमानात वेगाने घट होऊ लागली आहे. विदर्भ वगळता बहुतांश महाराष्ट्रात कमाल तापमान ४० अंशांच्या खाली घसरले आहे. मंगळवारी (ता. ४) सकाळपर्यंतच्या २४ तासांमध्ये विदर्भातील अमरावती येथे उच्चांकी ४३ अंश तापमानाची नोंद झाली.

राज्यात सापेक्ष आर्द्रता वाढत असून, पश्चिमेकडील वाऱ्यांचे प्रवाह बळकट होत असल्याने मॉन्सूनच्या आगमनास पोषक हवामान होत आहे. आजपासून (ता. ५) कोकण, मध्य महाराष्ट्र, मराठवाडा आणि विदर्भात वादळी वारे, विजांसह पूर्वमोसमी पावसाचा इशारा (यलो अलर्ट) हवामान विभागाने दिला आहे. उर्वरित राज्यात उन्हाचा ढगाळ हवामान व उकाडा कायम राहण्याची शक्यता वर्तविण्यात आली आहे.

मंगळवारी (ता. ४) सकाळपर्यंतच्या २४ तासांमध्ये नोंदले गेलेले कमाल तापमान (अंश सेल्सिअस मध्ये) :

पुणे ३५.३, धुळे ४१.०, जळगाव ४१.७, कोल्हापूर ३५.२, महाबळेश्वर २८.०, मालेगाव ३९.८, नाशिक ३५.५, निफाड ३६.८, सांगली ३५.३, सातारा ३५.४, सोलापूर ३९.१, सांताक्रूझ ३५.५, डहाणू ३७.२, रत्नागिरी ३५.०, छत्रपती संभाजीनगर ३८.८, बीड ३९.९, नांदेड ३८.२, धाराशिव ३८.९, परभणी ४०.१, अकोला ४१.६, अमरावती ४३.०, भंडारा ३९.५, बुलडाणा ३८.५, ब्रह्मपुरी ४१.८, चंद्रपूर ३८.२, गडचिरोली ३८.२, गोंदिया ४०.२, नागपूर ४१.८, वर्धा ४२.१, वाशीम ४०.४, यवतमाळ ४०.५

वादळी पावसाचा इशारा (येलो अलर्ट) :

कोकण : ठाणे, रायगड, रत्नागिरी, सिंधुदुर्ग.

मध्य महाराष्ट्र : नाशिक, नगर, पुणे, सातारा, सांगली, सोलापूर, कोल्हापूर.

मराठवाडा : छत्रपती संभाजीनगर, जालना, बीड, धाराशिव, लातूर, नांदेड, बुलडाणा, परभणी, हिंगोली.

विदर्भ : बुलडाणा, अकोला, अमरावती, वाशीम, यवतमाळ, वर्धा, नागपूर, भंडारा, गोंदिया, चंद्रपूर, गडचिरोली.