Pune News : पावसाला पोषक हवामान, ढगाळ आकाशामुळे राज्यात थंडी कमी झाली असतानाच राज्यात अनेक ठिकाणी हलक्या पावसाने हजेरी लावली आहे. आज (ता. १०) मध्य महाराष्ट्र, मराठवाड्यात तुरळक ठिकाणी ढगाळ हवामानासह हलक्या पावसाची शक्यता आहे. तर किमान तापमानात चढ-उतार होण्याचा अंदाज हवामान विभागाने वर्तविला आहे.

उत्तर भारतात थंडी कमी झाली असून, मंगळवारी (ता. ९) उत्तर प्रदेशातील मुझफ्फरनगर येथे देशाच्या सपाट भूभागावरील नीचांकी ५.४ अंश सेल्सिअस तापमान नोंदले गेले. राज्यात थंडी कमी झाली असून, धुळे येथील कृषी महाविद्यालयात राज्यातील नीचांकी १२.६ अंश सेल्सिअस तापमानाची नोंद झाली.

उर्वरित राज्याच्या बहुतांश भागात किमान तापमान १४ ते २० अंशांच्या दरम्यान आहे. कमाल तापमानात वाढ झाल्याने कोकणातील रत्नागिरी आणि हर्णे येथे देशातील उच्चांकी आज ३५.२ अंश सेल्सिअस तापमानाची नोंद झाली.

आग्नेय अरबी समुद्रात चक्राकार वाऱ्याची स्थिती कायम आहे. त्यापासून दक्षिण गुजरातपर्यंत हवेचा कमी दाबाचा पट्टा विस्तारला आहे. यामुळे राज्यात पावसाला पोषक हवामान झाल्याने मध्य महाराष्ट्र, मराठवाड्यात ढगाळ हवामानासह पावसाने हजेरी लावली. आज (ता. १०) मध्य महाराष्ट्रात, मराठवाड्यात तुरळक ठिकाणी हलक्या पावसाची शक्यता आहे.

मंगळवारी (ता. ९) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअस मध्ये) :

पुणे ३०.३ (१८.२), धुळे ३१.० (१२.६), जळगाव (१५.४), कोल्हापूर ३०.१ (२१.९), महाबळेश्वर २५.७ (१५.१), नाशिक (१७.७), निफाड २८.४ (१४.५), सांगली २९.९ (२२.२), सातारा ३१.२ (२०.२), सोलापूर ३१.८(२१.३), सांताक्रूझ ३५.१ (२२.२), डहाणू ३३.२ (२०.६), रत्नागिरी ३५.२ (२२.५),

छत्रपती संभाजीनगर २९.४ (१६.२), नांदेड (१८.८), परभणी ३०.२ (१७.०), अकोला ३०.८ (१६.०), अमरावती २९.० (१६.३), बुलडाणा २९.६ (१६.४), ब्रह्मपुरी ३२.० (१५.९), चंद्रपूर २९.२ (१४.०), गडचिरोली ३०.० (१५.२), गोंदिया २९.८ (१४.४), नागपूर २९.६(१५.६), वर्धा ३०.२(१६.०), वाशीम ३०.२ (१४.२), यवतमाळ ३०.५ (१५.०).