Pune News : विदर्भ वगळता संपूर्ण महाराष्ट्रात दि.१४ ते १७ नोव्हेंबरला तीन दिवस ढगाळ वातावरण राहून अगदीच तुरळक ठिकाणी झालाच तर नगण्य अशा किरकोळ स्वरूपाच्या पावसाची शक्यता निवृत्त हवामान शास्त्रज्ञ माणिकराव खुळे यांनी वर्तवली आहे.

सध्याच्या निरभ्र आकाशामुळे सध्या सकाळ-संध्याकाळी काहीशा  वाढत्या थंडीला, फक्त ह्या तीन दिवसासाठी विराम मिळेल, असा अंदाज खुळे यांनी दिला आहे. सध्या जाणवणारा हा वातावरणीय परिणाम विशेषकरून रत्नागिरी सिंधुदुर्ग सातारा सांगली कोल्हापूर सोलापूर धाराशिव लातूर ह्या जिल्ह्यातच अधिक जाणवेल.

उत्तर महाराष्ट्रातील नंदुरबार धुळे जळगांव नाशिक ह्या जिल्ह्यात हा परिणाम जाणवणार नाही. रविवारी म्हणजेच १७ नोव्हेंबरपासून पुन्हा थंडीसाठी स्थिती पूर्ववत होईल, अशी शक्यता खुळे यांनी वर्तवली आहे.

तसेच पुढील आठवडाभर महाराष्ट्रात दुपारचे कमाल आणि पहाटेचे किमान असे दोन्हीही तापमाने सरासरी इतके राहून कमाल तापमान हे ३१ तर किमान तापमान हे १५ ते १७ डिग्री सेंटीग्रेडच्या दरम्यान राहील.

तर पुढील आठवडाभर म्हणजे २० नोव्हेंबरपर्यन्त चक्रीवादळसाठीची कोणत्याही वातावरणीय प्रक्रियेची शक्यता नाही, असं हवामान शास्त्रज्ञ माणिकराव खुळे यांनी सांगितलं आहे.