Pune News : नैॡत्य मोसमी वाऱ्यांच्या (मॉन्सून) परतीच्या प्रवासाचा मुहूर्त लांबला आहे. मॉन्सूनच्या परतीसाठी पोषक हवामान होत असल्याने सोमवारी (ता. २३) पश्‍चिम राजस्थान आणि कच्छच्या काही भागांतून मॉन्सून परतीच्या प्रवासावर निघण्याची शक्यता हवामान विभागाने वर्तविली आहे.

वायव्य भारतात पावसाने सलग पाच दिवस उघडीप देणे. आर्द्रतेची टक्केवारी कमी होऊन कोरडे हवामान होणे, वाऱ्यांची दिशा बदलण्याबरोबरच परिसरावर घड्याळाच्या काट्याच्या दिशेने केंद्रभागातून बाहेरच्या बाजूला वारे वाहणारी क्षेत्रे (ॲण्टी सायक्लोन) तयार होणे आवश्यक असते. त्यानंतरच या भागातून मॉन्सून परतल्याचे जाहीर करण्यात येते.

दीर्घकालीन सर्वसाधारण वेळेनुसार १७ सप्टेंबर ही मॉन्सूनच्या राजस्थानातून परतीचा प्रवास सुरू करण्याची तारीख निश्‍चित करण्यात आली आहे. गतवर्षी २५ सप्टेंबर रोजी राजस्थान आणि गुजरातमधून परतीचा प्रवासाला सुरुवात केली होती.

वायव्य भारतात मॉन्सूनच्या परतीसाठी पोषक हवामान होऊ लागले असून, तेथे कोरड्या हवामानासह बाष्पाचे प्रमाणकमी होण्याचे संकेत आहेत. त्यामुळे सोमवारपर्यंत (ता. २३) राजस्थान आणि कच्छमधून मॉन्सून मुक्काम हलविण्याचे संकेत आहेत.