Pune Weather Update : अरबी समुद्रातील ‘बिपॉरजॉय’ चक्रीवादळामुळे मॉन्सूनच्या वाटचालीवर परिणाम झाल्याने सुमारे आठवडाभरापासून मॉन्सूनची वाटचाल थबकली होती. मॉन्सूनची वाटचाल पुन्हा सुरू झाल्याने कर्नाटक, आंध्र प्रदेशच्या आणखी काही भागासह पूर्व भारतातील राज्यात मॉन्सूनने प्रगती केली आहे.

यंदा मॉन्सूनचे केरळातील आगमन लांबले, देशाच्या मुख्य भूमीचे प्रवेशद्वार असलेल्या केरळमध्ये वारे सात दिवस उशिराने ८ जून रोजी डेरेदाखल झाला. रविवारी (ता. ११) मॉन्सूनने कोकण, दक्षिण मध्य महाराष्ट्रात प्रगती केली आहे.

सोमवारी (ता. १२) दक्षिण भारताच्या काही भागासह, संपूर्ण पूर्वोत्तर राज्ये आणि सिक्कीमसह, पश्चिम बंगाल, बिहारच्या काही भागात मॉन्सूनने प्रगती केली होती. ‘बिपॉरजॉय’ चक्रीवादळामुळे पश्चिम किनारपट्टीवर चाल केल्यानंतर मॉन्सूनची वाटचाल अडखळली होती.

चक्रीवादळ निवळल्यानंतर ईशान्य राजस्थानमध्ये ठळक कमी दाबाचे क्षेत्र सक्रिय आहे. महाराष्ट्राच्या काही भागात अंशतः ढगाळ हवामान होत आहे. मॉन्सूनची वाटचाल पुन्हा सुरू झाली असून, सोमवारी (ता. १९) कर्नाटक, आंध्र प्रदेशचा आणखी काही भागात प्रगती केली आहे.

तर पूर्व भारतातील पश्चिम बंगाल, झारखंड आणि बिहार राज्यांच्या काही भागात मॉन्सून आगेकूच केली आहे. मॉन्सूनच्या वाटचालीची सीमा दक्षिण भारतात रत्नागिरी, रायचूर, कावलीपर्यंत तर पूर्व भारतात कॉनिंग, शांतीनिकेतन, दुमकापर्यंत आहे.

मॉन्सूनच्या वाटचालीस पोषक हवामान असल्याने दक्षिण द्वीपकल्पाचा आणखी काही भाग, पश्चिम बंगाल, झारखंड, बिहारचा आणखी काही भाग, तसेच ओडिशा आणि पूर्व उत्तर प्रदेशच्या काही भागात गुरुवारपर्यंत मॉन्सूनची प्रगती होण्याची शक्यता हवामान विभागाने वर्तविली आहे.