Pune News : राज्याच्या अनेक भागात आजही पावसाने हजेरी लावली. तर काही भागात ढगाळ वातावरणासह ऊन पावसाचा खेळ सुरु होता. राज्यातील अनेक भागात पुढील चार दिवस पावसाचा अंदाज हवामान विभागाने दिला. तर चालू आठवड्यात काही ठिकाणी जोरदार ते अतिजोरदार पावसाचा अंदाज माणिकराव खुळे यांनी दिला.

माणिकराव खुळे यांनी सांगितले की, सध्या भारत महासागर विषुववृत्तीय परिक्षेत्रात असलेली एम.जे.ओ. ची उपस्थिती आणि सध्या होत असलेली कमाल तापमानातील वाढ यामुळे पुढील संपूर्ण सप्ताहात म्हणजे रविवार २५ ऑगस्टपर्यंत संपूर्ण महाराष्ट्रात शक्यतो दुपारनंतर 'उष्णता संवहनी' प्रक्रियेतून वीजा  आणि ढगांच्या  गडगडाटीसह मध्यम ते जोरदार पावसाची शक्यता जाणवते.

राज्यातील कोणत्या जिल्ह्यात कोणत्या तारखेला जोरदार ते अति जोरदार पावसाची शक्यता आहे, हे देखील श्री. खुळे यांनी सांगितले. आज म्हणजेच नंदुरबार, धुळे, जळगाव, नाशिक, नगर, पुणे, सातारा, सांगली, सोलापूर आणि कोल्हापूर अशा ११ जिल्ह्यांमध्ये काही भागात जोरदार ते अतिजोरदार पावसाचा अंदाज, असल्याचे श्री. खुळे यांनी सांगितले.

उद्या म्हणजेच बुधवारी मुंबईसह संपूर्ण कोकण व विदर्भातील एकूण १८ जिल्ह्यांमधील काही भागात जोरदार ते अतिजोरदार पावसाचा अंदाज आहे. तर गुरुवारी आणि शुक्रवारी म्हणजेच २२ आणि २३ ऑगस्ट रोजी नंदुरबार, धुळे, जळगांव, नाशिक, कोल्हापूर, आणि मुंबईसह संपूर्ण कोकण तसेच संपूर्ण विदर्भातील अशा एकूण ३३ जिल्ह्यांमध्ये पावसाचा अंदाज असल्याचेही श्री खुळे यांनी स्पष्ट केले.

शनिवारी नंदुरबार, धुळे, जळगाव, कोल्हापूर, छत्रपती संभाजीनगर, जालना, हिंगोली, परभणी तसेच मुंबईसह संपूर्ण कोकण आणि विदर्भातील सर्व जिल्हे अशा २६ जिल्ह्यांमध्ये पावसाचा अंदाज आहे. तर रविवारी म्हणजेच २५ ऑगस्ट रोजी मराठवाडा वगळता महाराष्ट्रातील २८ जिल्ह्यांमध्ये काही भागात जोरदार ते अतिजोरदार पावसाचा अंदाज असल्याचे श्री. खुळे यांनी स्पष्ट केले.