Pune News: माॅन्सूनच्या वाटचालीसाठी पोषक हवामान आहे. त्यामुळे पुढील २ दिवसांत माॅन्सून आणखी पुढे सरकण्याची शक्यता आहे. तर राज्यात पुढील ५ दिवस काही ठिकाणी हलक्या ते जोरदार पावसाचाही अंदाज हवामान विभागाने दिला.

माॅन्सूनने आजही प्रगती केली नाही. माॅन्सूनची अरबी समुद्रातील शाखा १६ दिवसांपासून एकाच भागात आहे. तर बंगालच्या उपसागरातील शाखा १४ दिवसांपासून एकाच ठिकाणी आहे. माॅन्सूनची सिमा आजही मुंबई, अहिल्यानगर, अदिलाबाद, भवानीपटना, पुरी आणि बालूरघाट परिसरात आहे.

आता माॅन्सूनच्या वाटचालीसाठी पोषक हवामान होत आहे. त्यामुळे माॅन्सूनची वाटचाल पुन्हा सुरु होण्याची शक्यता आहे. माॅन्सून १४ जूनपर्यंत मध्य भारतात आणि पूर्वेकडील राज्यांमध्ये काही भागात प्रगती करण्याची शक्यता आहे, असा अंदाज हवामान विभागाने दिला.

हवामान विभागाने राज्यातील काही भागात पुढील ५ दिवस मध्यम ते जोरदार पावसाचा अंदाज दिला. विदर्भात पावसाचा जोर काहीसा अधिक राहण्याचा अंदाज आहे. तर शुक्रवारपासून कोकणातही पाऊस वाढेल. विदर्भातील अकोला, अमरावती, यवतमाळ, चंद्रपूर, नागूपर आणि वर्धा जिल्ह्यात जोरदार पावसाचा ऑरेंज अलर्ट देण्यात आला. शनिवारपासून मात्र पावसाचा जोर कमी होण्याची शक्यता आहे.

मराठवाड्यातील जिल्ह्यांमध्येही पुढील ५ दिवस काही ठिकाणी हलक्या ते जोरदार पावसाचा अंदाज आहे. मध्य महाराष्ट्र आणि कोकणातही पुढील ५ दिवस काही ठिकाणी मध्यम ते जोरदार पावसाची शक्यता वर्तविण्यात आली आहे.