Pune News: मागील ४ दिवसांपासून राज्यातील अनेक भागात जोरदार पाऊस पडत आहे. त्यामुळे राज्यातील धरणांमध्ये पाणीसाठा वाढत आहे. तर पिकांना जिवदानही मिळाले. काही ठिकाणी पिकांचे नुकसानही झाले आहे. हवामान विभागाने आज आणि उद्या राज्यात काही ठिकाणी जोरदार पावसाचा अंदाज दिला. 

हवामान विभागाने आज पालघर, अमरावती तसेच पुणे आणि सातारा जिल्ह्यांच्या घाटमाथ्यावर अतिजोरदार पावसाचा रेड अलर्ट दिला. कोकणातील सिंधुदूर्ग, रत्नागिरी, रायगड, ठाणे आणि मुंबईत जोरदार ते अतिजोरदार पावसाचा अंदाज आहे. सातारा, पुणे, नाशिक, अहिल्यानगर, धुळे, जळगाव आणि नंदूरबार जिल्ह्यातही काही ठिकाणी जोरदार ते अतिजोरदार पावसाचा अंदाज देण्यात आला.

विदर्भातील सर्वच जिल्ह्यांमध्ये ठिकठिकाणी जोरदार ते अतिजोरदार पावसाचा अंदाज हवामान विभागाने दिला. मराठवाड्यातील परभणी, नांदेड, हिंगोली, छत्रपती संभाजीनगर आणि जालना जिल्ह्यात काही ठिकाणी जोरदार पावसाची शक्यताही वर्तविण्यात आली. 

उद्या विदर्भात काही ठिकाणी जोरदार पावसाचा येलो अलर्ट देण्यात आला. बुलडाणा, अकोला, अमरावती, वाशीम, यवतमाळ, वर्धा, नागपूर, गोंदीया, चंद्रपूर आणि गडचिरोली जिल्ह्यात पावसाचा अंदाज आहे. तर कोकणातील सर्वच जिल्ह्यांमध्ये काही ठिकाणी जोरदार ते अतिजोरदार पावसाचा अंदाज हवामान विभागाने दिला. मध्य महाराष्ट्राच्या घाटमाथ्यावरही जोरदार पावसाचा अंदाज आहे.

सोमवारपासून राज्यात पावसाचा जोर कमी होण्याची शक्यता आहे. सोमवारी आणि मंगळवारी रत्नागिरी आणि रायगड तसेच सातारा आणि पुणे जिल्ह्याच्या घाटमाथ्यावर काही ठिकाणी जोरदार पावसाचा अंदाज आहे. मात्र मध्य महाराष्ट्र, मराठवाडा, विदर्भात ढगाळ वातावरणा राहून काही ठिकाणी हलक्या सरी पडतील, अशी शक्यता हवामान विभागाने वर्तविली.