Pune News : कमी दाब क्षेत्रामुळे मॉन्सून सक्रिय झाल्याने राज्यात दमदार पावसाने हजेरी लावली आहे. आज (ता. २६) कोकण, मध्य महाराष्ट्राच्या घाटमाथ्यावर मुसळधार पावसाचा इशारा आहे. उत्तर महाराष्ट्रात जोरदार पावसाचा इशारा आहे. उर्वरित तुरळक ठिकाणी विजांसह मध्यम ते जोरदार सरींची शक्यता हवामान विभागाने वर्तविली आहे.

वायव्य मध्य प्रदेशात तीव्र कमी दाबाचे क्षेत्र (डिप्रेशन) सक्रिय असून, ही प्रणाली राजस्थान आणि गुजरातकडे सरकताना आणखी तीव्र होण्याचे संकेत आहेत. उत्तर बंगालच्या उपसागरात चक्राकार वाऱ्यांची स्थितीमुळे रविवारी (ता. २५) नव्याने कमी दाब क्षेत्राची निर्मिती झाली असून, पश्‍चिम बंगाल, ओडिशाकडे सरकणाऱ्या या प्रणालीची तीव्रता वाढण्याचे संकेत आहेत. मॉन्सूनचा आस राजस्थानच्या जैसलमेरपासून, कमी दाबाचे केंद्र, सिधी, चैबासा, दिघा ते ईशान्य बंगालच्या उपसागरापर्यंत सक्रिय आहे. गुजरातपासून उत्तर केरळपर्यंत किनाऱ्याला समांतर हवेचा कमी दाबाचा पट्टा तयार कायम आहे.

रविवारी (ता. २५) सकाळपर्यंतच्या २४ तासांमध्ये चंद्रपूर येथे उच्चांकी ३३ अंश तापमानाची नोंद झाली. पावसाची हजेरी, ढगाळ हवामानामुळे तापमानाचा पारा ३० अंशांच्या खाली घसरला आहे. राज्यातील उकाडा कमी झाला असून, हवेच गारठा जाणवू लागला आहे. कोकण, घाटमाथ्यासह राज्यात अनेक ठिकाणी जोरदार ते मुसळधार पावसाने हजेरी लावली आहे. आज (ता. २६) कोकण आणि घाटमाथ्यावर जोरदार सरींचा अंदाज आहे.

कोकण आणि मध्य महाराष्ट्राच्या घाटमाथ्यावर तुरळक ठिकाणी मुसळधार पावसाची शक्यता असल्याने ठाणे, रायगड, रत्नागिरी, सिंधुदुर्ग, नंदुरबार, नाशिक, पुणे, सातारा, कोल्हापूर जिल्ह्यांत दक्षतेचा इशारा (ऑरेंज अलर्ट) देण्यात आला आहे. उर्वरित कोकण, उत्तर महाराष्ट्रात तुरळक ठिकाणी जोरदार पावसाची शक्यता आहे. उर्वरित राज्यात ढगाळ हवामानासह ऊन-सावल्यांच्या खेळात पावसाच्या हलक्या सरींची शक्यता हवामान विभागाने वर्तविली आहे.

जोरदार पावसाचा इशारा (ऑरेंज अलर्ट) :

ठाणे, रायगड, रत्नागिरी, सिंधुदुर्ग, नंदुरबार, नाशिक, पुणे, सातारा, कोल्हापूर.

जोरदार पावसाचा इशारा (येलो अलर्ट) :

मुंबई, पालघर, धुळे, जळगाव.

विजांसह पावसाचा इशारा (येलो अलर्ट) :

बुलडाणा, अकोला, वाशीम, अमरावती, वर्धा, नागपूर.