Pune News : राज्यातील काही भागात पावसाची हजेरी सुरुच आहे. तर काही भागात आजही जोरदार पावसाची शेतकरी प्रतिक्षा करत आहेत. हवामान विभागाने पुढील ५ दिवस राज्यातील काही भागात जोरदार पावासाचा अंदाज दिला. तर उद्या राज्यातील बहुतांशी भागात पाऊस पडेल, असाही अंदाज हवामान विभागाने दिला. 

हवामान विभागाने आज कोकण आणि मध्य महाराष्ट्राच्या घाटमाथ्यावर अनेक भागात जोरदार पावसाचा अंदाज दिला, तर विदर्भ आणि मराठवाड्यातील काही भागातही जोरदार पाऊस पडेल, असे संकेत आहेत. तर इतर भागात हलक्या ते मध्यम सरी पडतील, असा अंदाजही हवामान विभागाने दिला. 

उद्या राज्यातील बहुतांशी भागात पावसाचा अंदाज आहे. मध्य महाराष्ट्रातील सातारा आणि पुणे जिल्ह्यात अनेक ठिकाणी अतिजोरदार पावसाचा रेड अलर्ट हवामान विभागाने दिला. कोकणातील सिंधुदूर्ग, रत्नागिरी आणि रायगड जिल्ह्यात अनेक ठिकाणी जोरदार पावसाचा ऑरेंज अलर्ट दिला. तर ठाणे, मुंबई आणि ठाणे जिल्ह्यात काही ठिकाणी जोरदार पावसाचा येलो अलर्ट देण्यात आला. 

मध्य महाराष्ट्रातील कोल्हापूर, नाशिक, नगर, धुळे, जळगाव आणि नंदूरबार जिल्ह्यात बहुतांशी ठिकाणी जोरदार पावसाचा येलो अलर्ट देण्यात आला. तर मराठवाड्यातील छत्रपती संभाजीनगर, जालना, बीड, परभणी, हिंगोली आणि नांदड जिल्ह्यातही अनेक ठिकाणी जोरदार पावसाचा अंदाज आहे. विदर्भातील बुलडणा, अकोला, वाशीम, यवतमाळ, अमरावती, नागपूर, वर्धा, गडचिरोली, भंडारा आणि गोंदीया जिल्ह्यात अनेक ठिकाणी जोरदार पावसाचा अंदाज हवामान विभागाने दिला.