Weather Update Pune आपल्या परिसरात पाऊस पडला, गारपीट (Hailstorm) झाली, तरीही ती माहिती नागरिक थेट हवामान विभागाला (Weather Department) देऊ शकणार आहेत. याबाबत हवामान खात्याने आपल्या संकेतस्थळावर ही सुविधा सुरू केली आहे. त्यात नागरिकांना हवामानाच्या हालचालींचीही (Weather Movement) नोंद करता येणार आहे.

हवामान खात्याने आपल्या https://mausam.imd. gov.in/ या वेबसाइटवर ‘पब्लिक ऑब्झर्व्हेशन’ नावाची विंडो सुरू केली आहे. त्यावर जाऊन नागरिक त्यांच्या क्षेत्रातील स्थानिक हवामान घडामोडींची माहिती देऊ शकतात. यामुळे हवामान खात्याला त्याचा ‘डेटाबेस’ अधिक तपशीलवार बनविण्यात मदत होईल. त्याचा फायदा शेतकऱ्यांना होईल.

हवामान विभाग आपल्या देशभरातील विविध केंद्रांद्वारे दररोज सर्व हवामान घडामोडींची माहिती आणि अंदाज देतात. त्यासाठी सॅटेलाइट इमेजेस आणि ‘रडार’ इत्यादी प्रणालींचा वापर केला जातो.

तर तापमान आणि पावसाच्या प्रमाणाची हवामान केंद्रांवर नोंद केली जाते. परंतु काही हंगामी घडामोडी असतात, ज्यांचा प्रभाव मर्यादित क्षेत्रापुरताच असतो. तर बऱ्याचदा तेथे कोणतेही हवामान केंद्र नसते. त्यामुळे त्या घटना अनेक वेळा दुर्लक्षित राहतात. त्यांची कोठेही नोंद नसते.

नागरिक अशी देऊ शकतात माहिती...

हवामान खात्याच्या https://mausam.imd.gov.in/ या संकेतस्थळावर ‘पब्लिक ऑब्झर्व्हेशन’ नावाची विंडो सुरू केली आहे. त्यामध्ये त्या राज्य, जिल्हा आणि संबंधित हंगामात घडलेल्या वेळेची माहिती देता येईल.

त्यासाठी यामध्ये वेगवेगळ्या हंगामी घडामोडींचे कॉलम आहेत, ज्यावर फक्त टीक करून माहिती द्यावी लागेल. यात झाडपडीसारख्या नुकसानीची माहितीदेखील देता येईल.

उपक्रमाचा उद्देश असा...

- हवामान विभागाच्या केंद्रांची संख्या मर्यादित. त्यामुळे सर्व माहिती मिळविण्याचा प्रयत्न

- नागरिकांकडून अभिप्राय आल्यास मोठा ‘डेटाबेस’ तयार करता येणार

- हवामान खात्याकडील आधीच्या आकडेवारीत नवीन माहितीची सांगड घालून त्यातील त्रुटी दूर करता येणार

- हवामानविषयक अधिक घडामोडींच्या ठिकाणी हवामान केंद्र स्थापन करता येणार