Weather Report : पावसाला पोषक हवामान झाल्याने राज्याच्या तापमानात चढ-उतार होत आहेत. आजपासून (ता. २३) कोकणातील सिंधुदुर्ग, कोल्हापूर, सांगली जिल्ह्यांत जोरदार वारे, विजांसह पावसाचा इशारा देण्यात आला आहे. तर उर्वरित राज्याच्या किमान तापमानात चढ-उतार होण्याचा अंदाज हवामान विभागाने वर्तविला आहे.

तमिळनाडूच्या आणि केरळमध्ये समुद्र सपाटीपासून ३.१ चक्राकार वाऱ्यांची स्थिती आहे. दक्षिण अंदमान समुद्रात चक्राकार वाऱ्यांची स्थिती तयार होत असून, या वाऱ्यांच्या प्रभावामुळे रविवारपर्यंत (ता. २६) कमी दाबाचे क्षेत्र तयार होण्याची तसेच त्याची तीव्रता वाढण्याची शक्यता आहे.

दरम्यान, राज्यात पावसाला पोषक हवामान होत असून, आजपासून महाराष्ट्राच्या दक्षिणकडे असलेल्या जिल्ह्यात पावसाची शक्यता आहे. सिंधुदुर्ग, कोल्हापूर, सांगली जिल्ह्यांत जोरदार वारे, विजांसह पावसाचा इशारा देण्यात आला आहे. तर सातारा, सोलापूर, धाराशिव, लातूर जिल्ह्यांत तुरळक ठिकाणी विजांसह पावसाची शक्यता हवामान विभागाने वर्तविली आहे.

बुधवारी (ता. २२) सकाळपर्यंतच्या २४ तासांमध्ये रत्नागिरी येथे देशातील उच्चांकी ३६.१ अंश सेल्सिअस तापमान नोंदले गेले. उर्वरित राज्यात कमाल तापमान ३१ ते ३५ अंशांच्या दरम्यान आहे. किमान तापमानातही चढ-उतार सुरूच असून, बुधवारी (ता. २२) धुळे येथील कृषी महाविद्यालयात राज्यातील नीचांकी १२.२ अंश सेल्सिअस तापमानाची नोंद झाली.

बुधवारी (ता. २२) सकाळपर्यंतच्या २४ तासांमध्ये नोंदले गेलेले कमाल तापमान, कंसात किमान तापमान (अंश सेल्सिअसमध्ये) :

पुणे ३०.६ (१४.९), धुळे ३२ (१२.२), जळगाव ३२.३ (१४.५), कोल्हापूर ३१.३ (१९), महाबळेश्‍वर २४.६ (१५.४), नाशिक ३१.३ (१४.७), निफाड ३१ (१३.१), सांगली ३१.४ (१७.९), सातारा ३१.५ (१६.५), सोलापूर ३५ (१९.८), सांताक्रूझ ३५.६(२२.८), डहाणू ३४.७ (२१.३), रत्नागिरी ३६.१ (२२.५), छत्रपती संभाजीनगर ३१.८ (१६.४), नांदेड - (१८.६), परभणी ३१.२ (१७.८), अकोला ३२.९ (१८), अमरावती ३२.८ (१८.५), बुलडाणा ३१ (१६.८), ब्रह्मपूरी ३३.७ (१८.६), चंद्रपूर ३१.८(१६.६), गडचिरोली ३० (१६), गोंदिया ३०.८ (१५.६), नागपूर ३१.४ (१६.८), वर्धा ३१ (१८), वाशीम ३३ (१७.६), यवतमाळ ३३.५ (१५.५).