Pune News : परतीचा पावसाला सुरूवात झाल्यानंतर राज्यासह पुणे जिल्ह्यातील वातावरणात बदल झाला आहे. अनेक ठिकाणी ढगाळ वातावरणासह जोरदार पाऊस कोसळत आहे. बुधवारी (ता.२५) सकाळी आठ वाजेपर्यंत खेड तालुक्यातील आळंदी येथे सर्वाधिक ८२ मिलिमीटर पावसाची नोंद झाली. या पावसामुळे सगळीकडे पाणीच पाणी झाले आहे.

गेल्या तीन ते चार दिवसांपासून जिल्ह्यात चांगलाच पाऊस होतो आहे. दिवसभर ऊन पडत असल्याने उकाड्यात मोठी वाढ होत आहे. मंगळवारी दुपारनंतर अनेक ठिकाणी पावसाने सुरूवात केली. बुधवारी देखील सकाळपासून ऊन पडले होते. त्यामुळे कमाल तापमानाचा पारा वाढत आहे.

परंतु दुपारनंतर वातावरणात बदल होत आहे. काही वेळा वेगाने पावसाच्या सरी कोसळत आहे. अचानक झालेल्या पावसामुळे पावसामुळे वेल्हे तालुक्यातील काही ठिकाणी वीजपुरवठा खंडीत करण्यात आला होता. पावसामुळे तालुक्यातील शेतकरी शेतामधील उरलेली कामे लवकर करण्यावर भर देत आहे.

आळंदीमध्ये मेघगर्जनेसह तब्बल तीन तास झालेल्या पावसामुळे रस्त्यांना पूर आला होता. तर पिंपळगाव येथे ३६ मिलिमीटर पाऊस पडला असून वाडा, राजगुरुनगर, कुडे, पाईट, चाकण, कन्हेरसर, कडुस येथे तुरळक सरी पडल्या. हवेलीतील भोसरी येथे ४९ मिलिमीटर, तर कळस ४० मिलिमीटर पाऊस पडला.

मुळशीतील थेरगाव, माले, मुठे येथे शिडकावा झाला. भोरमधील भोलावडे येथे ५३ मिलिमीटर, तर नसरापूर ४९, संगमनेर ४८, किकवी २१, भोर २४ मिलिमीटर, तर वेळू, आंबवडे, निगुडघर, मावळातील वडगाव मावळ, तळेगाव, काले, कार्ला, खडकाळा, लोणावळा, शिवणे येथे तुरळक सरी कोसळल्या. वेल्ह्यातील आंबवणे येथे ४९ मिलिमीटर, तर पानशेत, विंझर येथे हलका पाऊस झाला.

जुन्नरमधील वडगाव आनंद येथे ४४ मिलिमीटर, तर जुन्नर ३२, नारायणगाव २४, ओतूर २५ मिलिमीटर, निमगाव सावा, बेल्हा, राजूर, डिंगोरे, आपटाळे येथे हलका, आंबेगावमधील आंबेगाव येथे ४२ मिलिमीटर, कळंब २८, मंचर २० मिलिमीटर, शिरूरमधील न्हावरा येथे ५८ मिलिमीटर, वडगाव ३४ मिलिमीटर, तर टाकळी, मलठण, तळेगाव, रांजणगाव, कोरेगाव, पाबळ, शिरूर, बारामतीतील माळेगाव, पणदरे, वडगाव, लोणी, सुपा, मोरगाव, उंडवडी येथे हलका पाऊस झाला. इंदापूरातील निमगाव येथे २१ मिलिमीटर, तर भिगवण, इंदापूर, लोणी, बावडा, काटी, अंथुर्णी, सणसर येथे हलका, दौंडमधील पारगाव येथे ५८ मिलिमीटर पाऊस झाला.