Maharashtra agriculture minister: राज्याच्या राजकारणात घडणाऱ्या उलथापालथी नवीन नाहीत. मात्र अवघ्या आठ महिन्यांपूर्वी कृषिमंत्रीपदाची सूत्रं हाती घेतलेल्या माणिकराव कोकाटे यांच्याकडून खात्याची जबाबदारी काढून घेण्याची वेळ महायुती सरकारवर आली. आता कृषी खात्याची धुरा दत्तात्रय भरणे यांच्या हाती देण्यात आली आहे, तर कोकाटे यांना क्रीडा आणि युवक कल्याण विभाग सोपवण्यात आला आहे. या बदलामुळे महायुती सरकारमध्ये सुरू असलेली अंतर्गत खदखद आणि डेंमेज कंट्रोलची धडपड स्पष्टपणे दिसून येते. गेल्या काही काळात कृषी खाते नेहमीच चर्चेत राहिले आहे; पण त्यामागे सकारात्मक कारणांपेक्षा वादग्रस्त निर्णय, गैरव्यवहार आणि संभाव्य घोटाळे अधिक जबाबदार ठरले आहेत. त्यामुळे राज्यात कृषिमंत्री हे कपडे बदल्यासारखे वारंवार बदलले जात आहेत. यातून एक महत्त्वाचा प्रश्न उपस्थित होतो, या राज्यात असा एकही मंत्री नाही का, जो कृषी खात्याची जबाबदारी सक्षमपणे आणि दीर्घकालीन पातळीवर सांभाळू शकेल?