Konkan Weather Update: आज (ता. २७) दक्षिण कोकणात मुसळधार पावसाचा इशारा (ऑरेंज अलर्ट) आहे. उर्वरित कोकण, घाटमाथ्यावर जोरदार पावसाचा इशारा, तर विदर्भ, मराठवाड्यात वादळी वाऱ्यासह जोरदार पावसाचा अंदाज हवामान विभागाने वर्तविला आहे. बुधवारी (ता. २६) सकाळपर्यंतच्या २४ तासांमध्ये कोकणातील रत्नागिरी आणि सिंधुदुर्ग जिल्ह्यांत जोरदार पावसाने हजेरी लावली. मध्य महाराष्ट्र आणि विदर्भात तुरळक ठिकाणी हलक्या ते मध्यम स्वरूपाचा पाऊस पडला. किनाऱ्यालगतच्या अरबी समुद्रात मोठ्या प्रमाणावर बाष्प जमा होत असून, कोकण आणि घाटमाथ्यावर जोरदार पावसाच्या सरींना पोषक हवामान होत आहे.