महाराष्ट्रातील अवकाळी पावसाचे वातावरण निवळण्याची शक्यता असून, त्यामुळे रब्बी पिकांना मोठा दिलासा मिळू शकतो, असे हवामान विभागाचे निवृत्त शास्त्रज्ञ माणिकराव खुळे यांनी सांगितले. मागील आठवड्यात उष्णतेच्या वाढीमुळे कांदा व गव्हासारख्या पिकांवर विपरित परिणाम झाला. मात्र, अवकाळीमुळे तापमान २-३ अंशांनी घटल्याने काहीसा दिलासा मिळाला. सध्या कमाल तापमान कोकणात ३०-३२ अंश तर उर्वरित महाराष्ट्रात ३६ अंशांच्या दरम्यान आहे. पुढील १०-१२ दिवस तापमान सरासरीपेक्षा खाली राहण्याची शक्यता असून, त्यामुळे पिकांना मदत होईल. एप्रिलच्या पहिल्या आठवड्यात हवामान बदल होण्याची शक्यता असून, ‘एमजेओ’ सायकलच्या प्रभावामुळे हवामानात बदल होतील का, हे मार्चअखेर स्पष्ट होईल, असेही खुळे यांनी नमूद केले.