Banana price: केळीच्या दरात मागील आठवड्यात नरमाई आल्यानंतर तेव्हापासून दर स्थिरावले आहेत. सध्या केळीला सरासरी १५०० ते १८०० रुपयांचा भाव मिळत आहे. वाढती आयात आणि कमी उठाव यामुळे तुरीच्या दरातील मंदी कायम आहे. सरकारची तूर खरेदीही बंद झाली. त्यामुळे दोनच आठवड्यात तुरीचा भाव १५०० रुपयांची तुटला होता. सरकारने जवळपास ६ लाख टनांच्या दरम्यान तूर खरेदी केली. तुरीला सध्या ६ हजार ५०० ते ६ हजार ८०० रुपयांच्या दरम्यान भाव मिळत आहे. देशातील बाजारात नव्या मालाची आवक आणि सरकारने लादलेले स्टाॅक लिमिट यामुळे गव्हाचे भाव स्थिरावले आहेत. गव्हाचे भाव मागील महिनाभरात जवळपास २०० रुपयांनी कमी झाले आहेत. सध्या गहू २ हजार २०० ते २ हजार ५०० रुपयांच्या दरम्यान विकला जात आहे. जांभळाचा हंगाम आता सुरु झाला. सध्या बाजारातील आवक कमी आहे. जांभळाला सध्या गुणवत्तेप्रमाणे ६ हजार ते १२ हजार रुपये प्रतिक्विंटलच्या दरम्यान भाव मिळत आहे. बाजारातील कापसाची आवक आता खूपच कमी झाली. तरीही कापसाचे भाव कमीच आहेत. कापसाची दैनंदीन आवक १५ ते २० हजार गाठींच्या दरम्यान आहे. सध्या देशातील बाजारात कापूस ७ हजार २०० ते ७ हजार ५०० रुपयांच्या दरम्यान विकला जात आहे.