Shetkari shetrasta: शेतीमध्ये यांत्रिकीकरण वाढत चालल्यामुळे शेतकरी ट्रॅक्टर, रोटाव्हेटर, हार्वेस्टर यांचा वापर करत आहेत. तसेच शेतमाल वाहतुकीसाठी मोठ्या वाहनांची गरज असते. मात्र, अनेक ठिकाणी रस्ते अत्यंत अरुंद असल्यामुळे ही वाहने शेतात पोहोचवताना अडचणी येतात. ही गरज लक्षात घेऊन राज्य सरकारने पारंपरिक अरुंद शेतरस्त्यांना किमान ३ ते ४ मीटर रुंद करण्याचा निर्णय घेतला आहे. यासंदर्भातील शासन निर्णय देखील २२ मे रोजी जारी करण्यात आला आहे. महाराष्ट्र जमीन महसूल संहिता, १९६६ च्या कलम १४३ नुसार कार्यवाहीसाठी शासन निर्णय प्रसिद्ध केला आहे. अर्ज प्राप्त झाल्यानंतर ९० दिवसांच्या आत त्या अर्जावर निर्णय घेण्याचे आदेश संबंधित अधिकाऱ्यांना देण्यात आले आहेत. चालू आणि प्रलंबित प्रकरणेही शासन निर्णयाच्या ९० दिवसांच्या आत निकाली काढण्याचे आदेश. शेतकरी मागणी करत असलेल्या रस्त्याची प्रत्यक्ष पाहणी करून त्या रस्त्याची गरज तपासली जाणार आहे. अस्तित्वात असलेले नैसर्गिक मार्ग, पाऊलवाटा, वहिवाटीचे हक्क यांचा विचार केला जाईल. अडचणी असल्यास पर्यायी मार्गांचा विचार करून सोयीस्कर मार्ग निश्चित केला जाईल. अपवादात्मक परिस्थितीत, शक्य तितका अधिक रुंद रस्ता उपलब्ध करून देण्याची मुभा अधिकाऱ्यांना देण्यात आली आहे. बंधाऱ्यावरून रस्ता दिल्यास सीमांची स्पष्टपणे नोंद घेतली जाईल, जेणेकरून भविष्यात वाद टाळता येतील.