Trump import duty: अमेरिकेचे राष्ट्राध्यक्ष डोनाल्ड ट्रम्प यांनी भारतातून होणाऱ्या आयातीवर १ ऑगस्टपासून २५ टक्के शुल्क आणि दंड आकारण्याची घोषणा केली आहे. या निर्णयामुळे भारतातून होणाऱ्या कापड, कोळंबी, सोयापेंड, चमड्याच्या वस्तू, दागिने, औषधे, इलेक्ट्रॉनिक वस्तू आणि ऑटोमोबाईल उत्पादने यांच्या निर्यातीवर मोठा परिणाम होण्याची शक्यता आहे. भारताने आपल्या शेतीमाल आणि डेअरी उत्पादनांसाठी बाजारपेठ अमेरिकेसाठी खुली करण्यास नकार दिल्यामुळे हा निर्णय घेतल्याचे विश्लेषकांचे म्हणणे आहे. त्यामुळे भारतावर दबाव वाढवण्यासाठी ट्रम्प प्रशासनाने हा पाऊल उचलल्याचे मानले जात आहे.