soybean crop protection: हुमणी ही एक बहुभक्षीय आणि धोकादायक कीड असून, सतत बदलणारे हवामान आणि उन्हाळ्यातील अवकाळी पावसामुळे तिचा प्रादुर्भाव मागील दोन वर्षांपासून वाढताना दिसतो आहे. महाराष्ट्रात सोयाबीनसोबतच कापूस, भुईमूग, ऊस, आले आणि हळद अशा पिकांवरही या किडीचा मोठ्या प्रमाणात प्रादुर्भाव आढळतो. सामान्यतः मे महिन्यात पूर्वमोसमी पावसाच्या आगमनानंतर जमिनीत सुप्तावस्थेत असलेले हुमणीचे प्रौढ भुंगेरे बाहेर पडतात. यंदा पावसाचे आगमन नेहमीपेक्षा लवकर झाल्यामुळे सोयाबीनची पेरणी देखील लवकर झाली. परिणामी हुमणीच्या प्रजनन प्रक्रियेलाही वेग आला असून, भुंगेरे जमिनीत लवकर अंडी घालू लागले आहेत. त्यामुळे यावर्षी हुमणी अळीचा प्रादुर्भाव लवकर आल्याचे स्पष्ट होत आहे.