Weather Update: गुरुवारी (ता. २७) सकाळपर्यंतच्या २४ तासांत रत्नागिरीतील दापोली येथे सर्वाधिक १७० मिलिमीटर पावसाची नोंद झाली. रत्नागिरीसह, रायगड, सिंधुदुर्ग जिल्ह्यांत जोरदार पावसाने दमदार हजेरी लावली. मध्य महाराष्ट्र आणि विदर्भात तुरळक ठिकाणी हलका पाऊस झाला. अरबी समुद्रात ढगांची दाटी झाली असली तरी राज्यात उत्तर कोकण, मध्य महाराष्ट्रासह राज्याच्या अंतर्गत भागात अद्यापही जोरदार पावसासाठी वाट पाहावी लागत आहे.अरबी समुद्रातून मॉन्सून सक्रिय होत असल्याने राज्यात पावसाला सुरुवात होण्याची प्रतीक्षा आहे. आज (ता. २८) कोकणातील रायगड, रत्नागिरी, सिंधुदुर्ग आणि मध्य महाराष्ट्रातील पुणे, सातारा जिल्ह्यांच्या घाटमाथ्यावर तुरळक ठिकाणी जोरदार पावसाचा इशारा आहे. तर विदर्भात तुरळक ठिकाणी विजांसह वादळी पावसाचा इशारा (यलो अलर्ट) हवामान विभागाने दिला आहे.