Weather Update: विदर्भ, उत्तर महाराष्ट्र, मराठवाड्यात तुरळक ठिकाणी विजांसह पावसाची, तर उर्वरित राज्यात ऊन सावल्यांच्या खेळात हलक्या सरींची शक्यता हवामान विभागाने वर्तविली आहे. गुरुवारी (ता. २२) सकाळपर्यंतच्या २४ तासांमध्ये वर्धा येथे उच्चांकी ३५ अंश तापमानाची नोंद झाली. राज्यात अनेक ठिकाणी तापमान ३२ अंशांच्या वर आहे. ढगाळ हवामानामुळे उकाड्यात वाढ झाली आहे. तर उत्तर बांगलादेश आणि परिसरावर कमी दाबाचे क्षेत्र कायम असून, ही प्रणाली पश्चिम बंगालकडे सरकत आहे.यातच अरबी समुद्रात कर्नाटक गोव्याच्या किनाऱ्यालगत कमी दाबाचे क्षेत्र तयार झाले असून, ते उत्तरेकडे सरकत आहे.