fertilizer shortage India: महाराष्ट्रातील शेतकऱ्यांना तातडीने खताचा पुरवठा करण्यात यावा, या मागणीसाठी कॉंग्रेसच्या महाराष्ट्रातील खासदारांनी गुरुवारी (ता. ७) संसदेबाहेर केंद्रीय रसायन व खत मंत्री जे. पी. नड्डा यांच्या दालनासमोर ठिय्या आंदोलन केले. "खत द्या, महाराष्ट्रातील शेतकऱ्यांना खत द्या", "न्याय द्या, शेतकऱ्यांना न्याय द्या" अशा जोरदार घोषणांनी परिसर दणाणून गेला. आंदोलनात खासदार डॉ. कल्याण काळे, शिवाजीराव कळगे, वर्षा गायकवाड, प्रतिभा धानोरकर, बळवंत वानखेडे, शोभा बच्छाव यांचा सहभाग होता. या निदर्शनानंतर मंत्री नड्डा यांनी आंदोलक खासदारांची भेट घेऊन चर्चा केली. तसेच महाराष्ट्रातील खतसंकटाबाबत सचिवांशी संध्याकाळी बैठक घेऊन तातडीने योग्य निर्णय घेण्याचे आश्वासन दिल्याची माहिती खासदार डॉ. काळे यांनी दिली.