BT Cotton Crop: कपाशी लागवडीची दुसरी पद्धत आहे जोडओळ पद्धत.बीटी कपाशीची जोडओळ पद्धतीने लागवड करताना प्रत्येक तिसरी ओळ खाली ठेवावी. जोडओळीचा अवलंब करताना जमिनीचा प्रकार, वाण व त्याच्या वाढीचा प्रकार, सिंचन पद्धत अशा बाबी लक्षात घेऊन दोन ओळीतील अंतर कमी करावे. तसे काकरीने उभे काकर पाडावेत. समजा प्रचलीत पद्धतीने आपण ४ फूट बाय दीड फूट अशी लागवड करत असल्यास, याठिकाणी आपल्याला दोन ओळींतील अंतर कमी करताना साधारणत: तीन फूट राखावे लागेल. म्हणजेच उभे काकर आपल्याला तीन फुटी काकरीने व आडवे काकर सोयाबीनच्या सव्वा ते दीड फुटी काकरीने पाडावे लागते. शेतात तीन फूट बाय सव्वा ते दीड फूट याप्रमाणे आयताकृती चौफुल्या तयार होतील. यानंतर बीटी कपाशीची टोकण करताना दोन ओळी डोबल्यानंतर प्रत्येक तिसरी ओळ न डोबता खाली ठेवावी. म्हणजेच शेतात जोडओळीत लागवड होईल. म्हणजेच दोन ओळीतील अंतर ३ फूट, दोन जोड ओळीतील अंतर ६ फूट, दोन ओळींतील अंतर ३ फूट याप्रमाणे शेतात लागवड होईल. जोडओळ पद्धतीसाठी दोन ओळींतील अंतर कमी करताना झाडांची संख्या सरासरीच्या आसपास ठेवण्याचा प्रयत्न करावा.