मालेगाव, जि. नाशिक : मालेगाव तालुक्यातील नानाजी देशमुख कृषी संजीवनी योजनेचा (Nanaji Deshmukh Krushi Sanjivani Yojana) लाभ जास्तीत जास्त शेतकऱ्यांना होईल यासाठी प्रयत्न करण्यात यावेत. तसेच या योजनेची (POCRA Scheme) सर्व प्रलंबित कामे तत्काळ पूर्ण करावीत, अशा सूचना पालकमंत्री दादा भुसे (Dada Bhuse) यांनी केल्या.

मालेगाव विश्रामगृह येथे पालकमंत्री भुसे यांनी शनिवारी (ता. ५) नानाजी देशमुख कृषी संजीवनी योजनेची (पोकरा) आढावा बैठक घेतली. त्यात ते बोलत होते. प्रांताधिकारी विजयानंद शर्मा, उपविभागीय कृषी अधिकारी दिलीप देवरे, तालुका कृषी अधिकारी बाळासाहेब व्यवहारे, मंडल कृषी अधिकारी संदीप पवार, ज्ञानदेव शिंदे, अशोक गिरगुणे, मोहनीराज मोरे, गणपत शिंदे, सुधाकर सोनवणे, मच्छिंद्र बारे, अनिल बच्छाव, समाधान कदम, रत्ना सूर्यवंशी, राहुल जाधव, शीतल निकम, दीपमाला ठोठरे आदी उपस्थित होते.

भुसे म्हणाले, की कृषी विभागाने नानाजी देशमुख कृषी संजीवनी योजनेच्या प्रभावी अंमलबजावणीसाठी कार्यशाळा घेऊन अधिकाऱ्यांनी शेतकऱ्यांशी संवाद साधावा. मालेगाव तालुक्यात चालू हंगामात एकूण ४५ हजार ९५७ शेतकऱ्यांनी पीक विमा काढला आहे. त्यातील ३६ हजार शेतकऱ्यांनी कांदा, कापूस, मका, बाजरी, ज्वारी या पिकांचे नैसर्गिक आपत्तीमुळे नुकसान झाले असल्याचे सूचनापत्र दिले होते.

त्यानुसार विमा कंपनीने पंचनामे पूर्ण करून प्रथम टप्प्यात आतापर्यंत १७ हजार ७३ शेतकऱ्यांना पीक विम्यापोटी सुमारे ५ कोटी ५ लाख रुपये शेतकऱ्यांच्या बँक खात्यात जमा केले आहेत. त्याचप्रमाणे उर्वरित शेतकऱ्यांनाही येत्या १५ दिवसांत पीक विम्याची रक्कम त्यांच्या खात्यात जमा करण्यात येणार असल्याची माहिती अधिकारी दिलीप देवरे यांनी दिली.