Solapur News : वैयक्तिक शौचालयाचे अनुदान वेळेत द्या, जलजीवन मिशनची कामे तातडीने पूर्ण करा, यानंतरही कार्यवाही न झाल्यास निलंबन अटळ आहे, अशा शब्दात जिल्हा परिषदेचे मुख्य कार्यकारी अधिकारी दिलीप स्वामी यांनी अधिकारी-कर्मचाऱ्यांना इशारा दिला.

जिल्हा परिषदेत श्री. स्वामी यांनी व्हीसीद्वारे जिल्ह्यातील सर्व गटविकास अधिकारी, ग्रामीण पाणी पुरवठा विभागाचे उपअभियंता, शाखा अभियंता यांच्या बैठकीचे आयोजन करण्यात आले होते.

कक्षात उपमुख्य कार्यकारी अधिकारी अमोल जाधव, कार्यकारी अभियंता सुनील कटकधोंड आदी सहभागी झाले होते. जिल्ह्यात शौचालय बांधून तयार आहेत. मात्र ग्रामसेवक अनुदानाचा प्रस्ताव वेळेत देत नसतील, तर निलंबनाचे प्रस्ताव सादर करा, या ग्रामसेवकाना या पूर्वी दोनदा नोटिसा बजावण्यात आल्या आहेत. आता तिसरी नोटीस द्या, दोन हजार शौचालयाचे प्रस्ताव प्रलंबित आहेत.

तीन दिवसात अनुदान वितरित करा, अन्यथा कारवाई करू, असा इशाराही त्यांनी दिला. श्री. जाधव यांनी सांडपाणी व घनकचरा व्यवस्थापन अंतर्गत कामाबाबत सूचना दिल्या. श्री. कटकधोंड यांनी अधिकाऱ्यांनी फिल्डवर जाऊन कामे तपासावीत, असे सांगितले.

जलजीवनच्या कामाकडेही लक्ष द्या

जलजीवन मिशन योजनेच्या अनेक कामांच्या वर्क ऑर्डर देण्यात आल्या आहेत, पण त्यानंतरही कामे पूर्ण होत नसतील, तर कारवाई करावीच लागेल, जी कामे सुरू झाली आहेत, ती वेळेत पूर्ण करा, कामाचा दर्जा चांगला ठेवा, प्रत्येक स्टेजला फोटो आणि व्हिडीओ जतन करून ठेवा. नळजोडीची कामे महिनाभरात पूर्ण व्हायला हवीत, असेही मुख्य कार्यकारी अधिकारी स्वामी म्हणाले.