Nanded News : नांदेड जिल्ह्यात महात्मा गांधी राष्ट्रीय रोजगार हमी योजनेतंर्गत (Mahatma Gandhi National Employment Guarantee Scheme) कृषी विभागाकडून २०२२-२३ मध्ये फळबाग लागवड योजना (Orchard planting scheme) राबविण्यात आली. यात ३५३ शेतकऱ्यांनी २८३ हेक्टरवर फळबागेसह फुलझाडांची लागवड केली आहे.

यात सर्वाधीक ११९ हेक्टरवर आंबा फळपिकाची लागवड केल्याची माहिती कृषी विभागाच्या सूत्राने दिली.

कृषी विभागाकडूनही शेतकऱ्यांच्या शेतात तसेच बांधावर विविध प्रकारची फळबाग लागवडीचे कामे केले जातात. यात शेतकऱ्यांना तीन वर्षापर्यंत अनुदान आदायगी केले जाते. जिल्ह्यात सन २०२२-२३ मध्ये १५९० हेक्टरवर फळबाग लागवडीचा नियोजन आराखडा मंजूर केला होता.

यात शेतकऱ्यांनी विविध फळपिकांची लागवड करण्यासाठी नोंदणी केली होती. जिल्ह्यातील ३५३ शेतकऱ्यांनी २८३ हेक्टरवर फळबागेची लागवड केली आहे.

यात सर्वाधीक आंबा फळपिकांची ११९ हेक्टरवर लागवड केली आहे. तर सीताफळ ३४.६५ हेक्टर, पेरू ३१.९० हेक्टर, चिकू २५.४८ हेक्टर, मोसंबी २२.७० हेक्टर, कागदी लिंबू १८.६० हेक्टर, निशिगंध १०.५० हेक्टर, डाळिंब ४.८० हेक्टर, नारळ चार हेक्टर, मोगरा चार हेक्टर, गुलाब ३.८०, तर संत्रा तीन हेक्टर असा एकूण २८३.६ हेक्टरवर फळबाग व फूलबाग लागवड झाली आहे.

तालुकानिहाय फळबाग लागवड

(लागवड हेक्टरमध्ये, कंसात शेतकरी संख्या) : अर्धापूर १६०४० (२६), लोहा ६१.९५ (६१), मुदखेड ११.१० (१५), कंधार ३०.१५ (३९), नांदेड ५.१५ (१७), बिलोली ०० (००), देगलूर १२.९० (१४), धर्माबाद ६.२० (९), मुखेड ७.२० (७), भोकर ३६.४० (४३), हदगाव ४६.७० (५८), हिमायतनगर ९ (१२), किनवट १८.७५ (२४), माहूर ३.७८ (४), उमरी १२.३८ (१७)