Maharashtra Maize Market: रोखीने चुकारे आणि पारदर्शक व्यवहारांमुळे चांदूरबाजार बाजार समिती सोयाबीनसह मक्याच्या विक्रीचे महत्त्वाचे केंद्र बनले आहे. यंदा ऑक्टोबरअखेर सोयाबीनची आवक ९५३७ क्विंटलवर पोहोचली असून, मक्याचे दर प्रति क्विंटल २९०० रुपयांपर्यंत, तर सोयाबीनचे दर ७२६० रुपयांपर्यंत पोहोचले आहेत..चांदूरबाजार बाजार समितीने सोयाबीन आणि मक्याच्या उलाढालीत नजीकच्या काळात स्वतंत्र ओळख निर्माण केली आहे. विशेषतः लगतच्या मध्य प्रदेशातून होणारी मक्याची आवक या बाजार समितीसाठी महत्त्वाची ठरत आहे. मध्य प्रदेशातील काही जिल्ह्यांमध्ये मक्याचे मोठ्या प्रमाणावर उत्पादन घेतले जाते. हंगामात या भागातील शेतकरीही विक्रीसाठी चांदूरबाजारला पसंती देतात. त्यामुळे स्थानिक आवकेसोबतच सीमावर्ती भागातील मक्याच्या व्यापारालाही चालना मिळत आहे..Maize Supply Shortage: पावसाच्या तुटीचा मका पुरवठ्याला अधिक धोकाच; डन अँड ब्रॅडस्ट्रीटचा अहवाल.मध्य प्रदेशातील बहुतांश बाजार समित्यांमध्ये शेतमाल विक्रीनंतरची रक्कम बँक खात्यात जमा केली जाते. काही ठिकाणी ऑनलाइन व्यवहारांनाही प्राधान्य दिले जाते. मात्र, अनेक शेतकऱ्यांना माल विकल्यानंतर तातडीने रोखीने पैसे मिळण्याची अपेक्षा असते. चांदूरबाजार बाजार समितीत मालाची विक्री होताच रोखीने चुकारे केले जात असल्याने या शेतकऱ्यांसाठी ही बाजारपेठ सोयीची ठरते. पारदर्शक खरेदी-विक्री प्रक्रिया आणि तातडीने मिळणारा परतावा यामुळे हंगामात बाजार समितीत मक्याची मोठी उलाढाल होते..गेल्या वर्षी ऑक्टोबरअखेर या बाजार समितीत २५६३ क्विंटल मक्याची आवक नोंदविण्यात आली होती. यंदाही मक्याची आवक वाढती असल्याचे बाजार समिती प्रशासनाकडून सांगण्यात आले. गेल्या हंगामात मक्याला प्रतिक्विंटल १२०० ते १८८३ रुपये दर मिळाला होता. यंदा मात्र पावसाच्या कमतरतेमुळे पिकांच्या उत्पादकतेवर परिणाम झाला आहे. त्यातून बाजारातील आवक आणि दरांवरही परिणाम होण्याची शक्यता आहे. सध्या मक्याचे व्यवहार प्रति क्विंटल १७०० ते २९०० रुपयांदरम्यान होत आहेत..यंदा पावसाअभावी सोयाबीन आणि मक्याच्या उत्पादकतेवर परिणाम झाला आहे. त्याचा परिणाम पुढील काळातील बाजारातील आवक, दरांची दिशा आणि शेतकऱ्यांच्या उत्पन्नावर होऊ शकतो. त्यामुळे आवक वाढत असली, तरी प्रत्यक्ष उत्पादनातील घट आणि बाजारभाव यांचा ताळमेळ शेतकऱ्यांसाठी महत्त्वाचा ठरणार आहे..सोयाबीनच्या दरातही वाढमक्यासोबतच सोयाबीनच्या आवकेतही वाढ झाली आहे. गेल्या वर्षी ऑक्टोबरअखेरपर्यंत ७४६२ क्विंटल सोयाबीनची आवक झाली होती. यंदा याच कालावधीत आवक वाढून ९५३७ क्विंटलवर पोहोचली आहे. गेल्या हंगामात सोयाबीनला प्रतिक्विंटल ४३२३ रुपये दर मिळाला होता. यंदा सोयाबीनचा किमान आधारभूत दर ५७०८ रुपये असताना बाजारात प्रत्यक्ष व्यवहार ६५०० ते ७२६० रुपये प्रतिक्विंटल दरम्यान होत आहेत. त्यामुळे सध्या सोयाबीनचे दर हमीभावापेक्षा अधिक असल्याचे चित्र आहे..खरेदी-विक्रीतील पारदर्शकता आणि रोखीने चुकारे अशा विविध कारणांमुळे शेतकरी हंगामात मोठ्या प्रमाणावर माल विक्रीसाठी आणतात. लगतच्या मध्य प्रदेशातूनही मक्याची आवक होते. यंदा पावसाअभावी सोयाबीन आणि मक्याच्या उत्पादकतेवर परिणाम झाला असून, त्याचा बाजारातील आवकेवरही परिणाम होण्याची शक्यता आहे.सतीश मोहोड, सभापती, बाजार समिती, चांदूरबाजार.ॲग्रोवनचे सदस्य व्हाशॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
