PM Kisan Yojana Update : प्रधानमंत्री किसान सन्मान निधी पोर्टलवरील नोंदणीकृत पात्र लाभार्थ्यांना किसान सन्मान योजनेचा लाभ अखंडितपणे मिळावा यासाठी सर्व पात्र लाभार्थ्यांनी ई-केवायसी करून घ्यावी, असे आवाहन जिल्हाधिकारी मनीषा खत्री यांनी केले आहे.

प्रधानमंत्री किसान सन्मान निधी योजनेतंर्गत १४ व्या हप्त्याचे वितरण करण्यात येणार आहे. यासाठी १ मेपासून गावपातळीवर सर्वत्र मोहीम राबवून ई-केवायसीसाठी सामाजिक सुविधा केंद्र (सीएससी) व बँक खाती आधार संलग्न करण्यासाठी इंडिया पोस्ट पेमेंट बँक (आयपीपीबी) यांच्या समन्वयाने कॅम्प आयोजित करण्यात आले आहेत.

केंद्र शासनाने पीएम किसान पोर्टलवर शेतकरी सदरात ओटीपीच्या आधारे, तसेच सामाईक सुविधा केंद्रामध्ये व अँड्रॉइड मोबाईलवर पीएमकिसान ॲपवरसुद्धा ई-केवायसीची सुविधा उपलब्ध करून दिली आहे.

या सुविधेमुळे लाभार्थ्यांना स्वत:सह अन्य ५० लाभार्थ्यांचेही ई-केवायसी प्रमाणिकरण करता येणार आहे. पीएम सन्मान योजनेचा अखंडित लाभ घेता यावा यासाठी पात्र लाभार्थ्यांना ई-केवायसीसाठी आपले आधारकार्ड घेऊन सीएससी सेंटर, आपले सरकार सेवा केंद्रावर, तसेच नजीकच्या पोस्ट कार्यालयात जाऊन ई-केवायसी करावी.

जे शेतकरी ई-केवायसी करतील, त्यांनाच यापुढे प्रधानमंत्री किसान सन्मान निधी योजनेचा लाभ मिळणार आहे. त्यामुळे लाभार्थ्यांनी ई-केवायसी करावी, असे आवाहन श्रीमती खत्री यांनी प्रसिद्धी पत्रकान्वये केले आहे.