सिंधुदुर्गनगरी ः हवामानावर आधारित फळपीक योजनेअंतर्गत (Fruit Crop Insurance) जिल्ह्यातील २२ हजार ३४८ आंबा, काजू फळपिकांचा बागायतदारांनी आतापर्यंत विमा (Crop Insurance) उतरविला आहे. पीक क्षेत्र सरंक्षित करण्यासाठी अजूनही चार दिवस शिल्लक असून, बागायतदारांनी तातडीने पीकविमा क्षेत्र संरक्षित करावे, असे आवाहन कृषी विभागाच्या (Agriculture Department) वतीने करण्यात आले आहे

अवेळी पाऊस, कमी आणि अधिक तापमान, गारपीट, अतिवृष्टी, वारा, यासह विविध नैसर्गिक आपत्तीत फळपिकांचे मोठ्या प्रमाणात नुकसान होते. त्यातून शेतकरी कोलमडून जातो. त्यामुळे शेतकऱ्यांचे आर्थिक स्थैर्य कायम राहावे या हेतुने शासनाने फळपीक विमा योजना सुरू केली.

या योजनेत कोकणातील आंबा आणि काजू या फळपिकांचा समावेश आहे. पाच वर्षांवरील आंबा, काजू पीक क्षेत्र संरक्षित करता येते. या पीकविमा योजनेचा अधिकाधिक बागायतदारांनी लाभ घ्यावा यासाठी कृषी विभाग आणि विमा कंपन्यांनी चित्ररथ तयार केला होता.

दरम्यान, आतापर्यंत सिंधुदुर्गातील १६ हजार १८७ आंबा, तर ६ हजार १६१ काजू बागायतदारांनी फळपीक क्षेत्र संरक्षित केले आहे. पीक क्षेत्र संरक्षित करण्यासाठी ३० नोव्हेंबरपर्यंत मुदत आहे. गेल्या वर्षी २८ हजार आंबा, काजू बागायतदारांनी पीक क्षेत्र संरक्षित केले होते.

या क्षेत्रावरील झालेल्या नुकसानीपोटी बागायतदारांना ८० कोटी रुपये भरपाई मिळाली आहे. गेल्या वर्षीच्या तुलनेत सहा हजार बागायतदारांनी अजूनही पीक क्षेत्र सरंक्षित केलेले नाही. अधिकाधिक शेतकऱ्यांनी तातडीने विमा उतरवावा, असे आवाहन कृषी विभागाने केले आहे.